Israel-Hamas war : Israel-in Gaza City-a civil mite khua chhuahsan turin hrilh

Israel leh Palestinian firfiak pawl, Hamas-te chu nimin kha ni sarih an indona a ni ta. Nimin kha Israel sipai chuan Gaza Strip hmar lam, mi maktaduai 1.1 vel chenna Gaza City-a civil mite chu darkar 24 chhunga an khua chhuahsan a, chhim lama inthliarfihlim turin a hrilh.

Israel sipaite hian air strike hmanga Gaza Strip-a Hamas hmun pawimawh hrang hrangte an beih hnuah, ground operation neih hi a tum a, tank ṭhahnem tak nen luhchilh a tum.

Defence minister Yoav Gallant chuan Hamas-te beihna avanga Israel ramah mi 1,300 chuangte thihna a thlen hnu leh, Israel sipaiten indo thlawhtheihna hmanga Gaza an beih let mek karah, nimin khan "Tun hi indo hun a ni ta", tiin nimin khan a sawi.

Gaza City-ah na taka beihpui thlak a ni dawn tih sawiin, Israel sipaite chuan civil mite chu inthliarfihlim tur leh, hriattirna an pek leh hunah chauh kir turin an ti. Gaza Strip-a beihpui thlaknaah hian Palestinian 1,500 chuang an thi tawh a ni.

Israel sipaite chuan Hamas firfiakte chuan inphenna atan civil mite an hmang tih sawiin, civil mite chenna inchhung leh in hnuaiahte an biru niin an sawi. Hei vang hian civil mite chu an in chhuahsan a, hmun him lam pan turin an hrilh lawk.

Hamas chuan Israel sipaiten Gaza City chhuahsana turin civil mite an hrilh hnuah, Gaza Strip-a chengte chu an in chhuahsan lo turin a ti ve thung. Nimin chawhnu lam thleng kha chuan civil mi inthiarchhuak hi an la awm lo nia hriat a ni. Mi tam tak chu Al-Shifa Hospital bulah pungkhawmin, khawpui chhuahsan an tum loh thu an sawi.

United Nations chuan Israel sipaite hnenah Gaza mipuite insawnchhuak tura a hriattirna chu sut turin a ngen a, indona avanga tuna an dinhmun chhe tawh tak ngaihtuahin hmun danga insawnchhuah chu thil theih loh a ni, a ti.

Israel-in Gaza Strip tana tui, electric leh tuialhthei supply te a tihtawp sak avangin, Gaza Stripa power plant awmchhun chu hman theih a ni tawh lo. Hamas-ten an mi hrente an chhuah vek hma chuan chhawmdawlna thawn luh pawh an remti dawn lo tih an sawi bawk.

International Committee of the Red Cross (ICRC) chuan Gaza-a hospital hrang hrangte pawhin fuel hman tur an nei tawh lo tih a sawi a, U.N. World Food Programme (WFP) pawhin ei tur leh tui thianghlim an tlachham ṭan tawh niin a sawi bawk.

Khawthlang ram hrang hrangten Hamas-te chet dan dem a, Israel-in a ram venghim tura dikna a nei tia an sawi karah, Iran president Ebrahim Raisi chuan Islamic leh Arab ramte chu tangrual a, Israel-in Hamas a beih mek do let turin a sawm. Raisi hian Syria president Bahsar Assad chu telephone-a biain, Palestinian mite chunga Zionist-te pawikhawihna dang turin, Islamic leh Arab ramte leh, khawvel mipuite chu an thawhho a ngai a ni, a ti. Nilaini khan Iran President hian Israel-Hamas indona thleng mek chungchang chu Saudi Arabia hotu, Crown Prince Mohammed Bin Salman chu a lo sawipui tawh bawk. Zionist-te dang tur hian, Iran chuan Islamic ramte chu a rang thei anga thawhhopui a tum tih Iran President website-ah an tarlang bawk a ni.