Taliban-in Pakistan chhawmdawlna pek dawng duh lo

Afghanistan-a lir­nghing vanga chhiatna nasa tak thleng tuartute chhawmdawlna tur, Pakistan sorkarin a pek chu Afghanistan-a rorellai, Taliban-te chuan an pawm duh lo.

Kar liam ta Inrinni khan magnitude 6.3-a nain Aghanistan khawthlang lam, Herat province-ah lir a nghing a, lirnghingin chhiatna a thlena thi hi mi 1,000 chuang an ni tawh. Thingtlang khaw eng emaw zatin chhiatna an tuar bawk. Nilaini khan he province-ah vek hian magnitude 6.3-a na bawkin lir hi a nghing nawn leh a ni.

Pakistan prime minister Anwaar-ul-Haq Kakar chuan an ṭhenawm, Afghanistan-a lirnghing tuarte tan chhawmdawlna pek a, chhanchhuah hna thawktu lam pawh tirh an tum thu a sawi. Mahse Taliban sorkarin aw an pawh duh loh vangin chhawmdawlna pawh hi a la thawn thei lo.

Afghanistan-a Tali­ban-ten thuneihna an chan hnuah, Pakistan-a pawikhawihna thlentu firfiakte chu Taliban sorkar chuan a lo hum ṭhin niin Pakistan chuan a puh. Mahse he puhna hi Taliban-te chuan an pha thung. Hei vang hian ram pahnihte inkar hi a ṭha lo hle a, Pakistan chhawmdawlna pek tum an lo hnar hian an boruak pawh a tihchhiat zual phah rin a ni bawk.