North Korea-in rocket kap chhuak UN-in emergency meeting ko

North Korea chuan satellite phurtu rocket chu hlawhtling takin a kap chhuak tih nimin khan a sawi.

North Korea hian February 8-25 inkarah rocket hi kah chhuah a tum thu a lo sawi tawh a, mahse a tum hun hi sawn hma leh thutin, nimina kapchhuah turin an ram hotu lu ber, Kim Jong UN chuan thupek a siam a ni.

Satellite phurtu rocket hi an ram sanaa zing dar 9-ah Cholsan County, North Phyongan Province-a Sohae Space Center aṭangin kahchhuah a ni. North Korean National Aerospace Development Administration chuan space center aṭanga kahchhuah a nih hnu minute 10 velah satellite Kwangmyongsong-4 chuan orbit a lut tih a sawi.

North Korea-in rocket a kahchhuah tur hi ramdangte chuan an ngaimawh hle a, indona hmanrua ballistic missile enchhinna tur nia an ngaih avangin sawiselin, an vau lawk hial a ni.

Nimin vek khan United Nations Security Council chuan NKorea-in UN hrekna palzut a rocket a kahchhuah avangin New York-ah emergency meeting a ko nghal. He meeting hi South Korea bakah council member Japan leh United States-te ngenna anga koh a ni.

NKorea ram ṭhianṭha, China chuan NKorea chet dan chu pawi a tih thu a sawi a, hemirual hian Korean peninsula-a boruak chhe zawk a thlen lohna tura che lo turin ram dangte a ngen.

UN Security Council resolution chuan North Korea hi nuclear emaw, ballistic missile test emaw a khapsak. Mahse khapna hi NKorea chuan ṭum li a palzut tawh a ni. Kum 2006, July tha khan longrange missile Taepodong-2 a kapchhuak a, kum 2009 April thlaah rocket a kapchhuak leh bawk. NKorea chuan rocket hi hlawhtling taka kahchhuah a nih thu sawi mah se, US chuan a hlawhtling lo niin a sawi thung. Kum 2012, December thla khan rocket kapchhuakin, orbit-a satellite an dah luh thu NKorea chuan a sawi a, nikum May thla khan tuihnuailawng aṭangin a vawikhatna atan missile a enchhin thu a sawi bawk a ni.