Iraq-in Baghdad khawpui a hung dawn

Iraq security force-te chuan Islamic State (IS) firfiak pawl laka civil mite an himna turin, an ram khawpui Baghdad hungna bang an siam
ṭan mek.

Prime Miniser Haider al-Abadi office chuan thuchhuah siamin, "Khawpui chhunga civil mite hi firfiakte pawikhawihnalaka venhim chu kan tih tur a ni. Civil mite khawpui chhung him taka an luh an chhuah theihna turin checkpoint-te siamṭhat leh a ni a, hmun awl awmte pawh dan vek an ni" a ti.

Iraq thuneitute chuan Baghdah khawpui hi meter thum-a sanga hung an lo rel tawh a, hei hi IS firfiak emaw, ralthuam tawlhtur ṭhinten khawpui chhung lut a, pawisawilo civil mit tawrhna an thlen ṭhinte danna atana an tih a ni.

Abadi chuan, "Baghdah hi Iraq mipui zawng zawng tana khawpui a ni reng a, a hungna bang siam anih vang hian khawpui pawna chengte lakah a in la hrang ta tihna a ni lo" tiin, khawpui hungna bang siam tum sawiseltu political party hrang hrangte a chhang let. Eptute chuan khawpui hungna siam hi sorkarin an ram ṭhendarh a tumna niin an puh thung.

Baghdad khawpui hung hna hi thawh hniha siam tum a ni a; firfiakte hluarna, hmarlam leh khawthlang lamte chu thawh hmasak a ni ang. Khawpui chhunga district eng emaw zat chu kum sawm liamta khan helho laka invenna turin an lo inhung tawh a ni. Mahse khawpui pum hi concrete bang hmanga hung tum a nih tak avang≠in district indaidanna bangte hi ṭhiah a ni thung ang. Security lam chuan khawpui hungna bangah hian surveillance camere bakah puak thei thil man thei tur hmanrua te pawh dah a ni dawn tih an sawi.