Afghanistan-a inbeihnaah police 11 leh firfiak 10 thi
Afghanistan hmarlam, Kunduz province-a Nilaini zana police leh Taliban firfiakte inbeihnaah police 11 leh firfiak 10 an thi niin official-te chuan an sawi.
District chief Hayyatullah Amiri chuan, "Firfiakte hian assault rifle, machine gun leh rocket propelled grenade hmangin Khan Abad district headquarters khawthlang lam, Posta-i-Godam a Afghan National Police checkpoint an bei a ni. Police-te hian firfiakte hi an lo kap let ve nghal a, tukin zing thleng khan a inkap a ni," tiin nimin khan a sawi.
Hun eng emaw chen an inkah hnuah firfiakte hi an tlanchhia a, nimin thleng khan police-te hian check point beitute hi zawngin beihpui an thlak zui nghal bawk. Firfiakte hian checkpoint aṭang hian ralthuam eng emaw zat an ruchhuak nia sawi a ni. Taliban thupuangtu, Zabiullah Mujahid chuan media mite hnenah Kunduz-ah an mi leh sate leh police-te an inbeih thu hi a sawichiang tawh bawk a ni.
Kunduz province-ah hian Taliban leh security force-te hi an inbei fo a, firfiakte hian district office, military camp, security checkpoint te an bitum ṭhin. Security force-te pawhin airstrike hmangin firfiakte hmun hi an beilet fo a ni.