Israel-in khawmual, boruak leh tuipui aṭangin beihpui thlak dawn; Gaza City aṭangin civil mi tam tak tlanchhuak tawh

Israel leh Hamas-te indo mekah, Israel sipaite chuan khawmual, boruak leh tuipui aṭangin beihpui an thlak dawn tawh tih an sawi a, a hun tak erawh an la sawilang lo. Gaza Strip ramriah erawh chuan tank-te pawh a chhawp fel tawh a ni.

Kar liam ta Zirtawpni khan Israel sipaite hian Gaza City-a cheng, civil mite chu chhim lamah inthiarfihlim turin a lo hriattir tawh a, he khawpui aṭang hian mi sing tel chu motor leh ke-in an tlanchhuak tawh a ni. Israel chuan tlanchhuak duhte tan him taka an chhuah theihna turin, an tlanchhuahna kawngah chuan chawhma dar 10 aṭanga chawhnu dar 1 thleng chu beihpui an thlak dawn lo tih an sawi.

Hetih lai hian Hamas lam chuan civil mite hi tlanchhuak lo tura tiin, kawngpuite chu a him lo niin a sawi. Tlanchhuah tum zinga ṭhenkhat chu an chuanna motor kah fuh a nih vangin an thi niin an sawi ve thung.

UN humanitarin agency, OCHA chuan Gaza Strip chhim lam pana insawnchhuak hi an la awm chhunzawm zel tih sawiin, chhim lam biala thuneitute pawh tlanchhe lut an tam avang hian an buai hle tawh niin a sawi.

Hamas-te nena an inbeih mek karah, Israel hmar lam, Lebanon nena an inrinaah pawh buaina a chhuak chho tawh. Lebabon aṭanga missile kahchhuah vangin Israel civil mi pathum an thi tawh a ni. Israel Defence Force (IDF) chuan Pathianni khan Lebanon nena an inrinaah hian km 4 huam chhung chu security zone-ah siamin, ramri aṭanga km 2 huam chhunga chengte chu bomb shelter emaw, safe room-ah emaw awm turin an chah.

US chuan Israel beitute lo dang turin aircraft carrier pahnihna a thawn lut tawh bawk. Hetih lai hian Iran pawhin Israel vauin, Gaza Strip a la bei chhunzawm zel a nih chuan a nghawng na tak a tuar ang, a ti.

Gaza Health Ministry chuan indona avanga Palestinian thi hi mi 2,329 an tling tawh niin nimin kha a sawi a, hliam tuar 10,000 chuang an awm tawh bawk. Gaza war vawi nga thleng tawhah Palestinian thi an tam ber ṭum a ni tawh a ni. Kum 2014-a Israel leh Hamas indonaah khan UN-in a chhinchhiah danin Palestinian thi 2,251 awmin, an zinga mi 1,462 chu civil mi a ni. Hemi ṭum hian Israel lamah thi 74 an awm bawk a, civil mi paruk an tel.

Israel tan pawh tun ṭum hi kum 1973-a Egypt leh Syria nena an inbeih hnuah, indonaa an mi leh sa thi an tam ber ṭum a ni tawh bawk. Israel mi thi hi 1,300 an chuang tawh a ni.