Zika virus do let nan dollar tld 1.8 dil dawn

White House chuan tunlaia hri leng mek, Zika virus do letna atan US Congress hnenah emergency fund, dollar tluklehdingawn 1.8 a dil dawn.

Emergency fund a dil zinga ṭhenkhat hi Zika virus hri thlentu thosi tihremna tur programme siamna atan hman a ni ang a,vaccine siamna atan hman a nih bakah, hri lengin a tihbuai mek ramte ṭanpuina pek a ni bawk ang.

CBS News in a kawmnaah US President Barack Obama chuan, "Thu lawawm tak chu Ebola angin Zika virus hi miin an thihpui lo a, a vei tam tak pawhin an vei a ni tih an inhre lo a ni" a ti. Hri leng avang chuan mipuite chu chiai phah lo turin a chah bawk.

President Obama chuan naupiang zinga pianphung pangngai aia lu te leh thluak te, microcephaly te chu Zika virus-in a thlen nia rin ni mah se, hei hi finfiahna a la awm lo niin a sawi.

World Health Organization chuan Zika virus hi khawvel ram pum tana hlauhawm nia ngaiin pubic heath emergency a lo puang tawh a, kumin chhungin America ramah he hri hi mi maktaduai li velin an kai rin a nih thu a tarlang.

US-a Centers for Disease Control and Prevention chuan nikum December thla aṭang khan US-ah Zika virus kai finfiah mi 50 an awm tawh a, an vai hian hri lenna Latin America leh Caribbean rama zinte an ni tih a sawi.

National Institute of Allergy and Infectious Diseases hotu, Dr Anthony Fauci chuan vaccine siam tumin hma lak mek a ni tih thu leh, kumin kum laihawlah bul an ṭan theih a beisei thu a sawi. Hemirual hian Zika vaccine siam tur chuan hun a duh rei a rin thu a sawi.