Grand Ethiopian Renaissance Dam buaina chinfel tum

Ethiopia rama tuikhuah "Grand Ethiopian Renaissance Dam (GERD)" chungchanga inrem lohna awm chu chinfel a nih theihna turin January 28-29 hian Egypt, Ethiopia leh Sudan-te chuan inremna thuthlung ziah an tum.

Ethiopia rama tuikhuah siam mek hian Nile lui a pawh pen dawn vangin GERD chungchangah hian ram pathumte hi an inrem thei lo a, Egypt lam chuan nasa taka sawiselin, tui lamah harsatna an neih an rin avangin he tuikhuah siam hi an duh lo hle. 

Ethiopia hian Grand Ethiopian Renaissance Dam hi kum 6 chhunga zawh an duh a, kum 2011 aṭang khan an khuap ṭan a, kum 2017 August thla khan zaa 60 an zo tawh a ni. Bul-

ṭan a nih  aṭang khan Egypt leh Sudan chuan an sawisel nghal a, hei vang hian hna hi zawhfel lohin a awm a ni. Nilaini khan US president Donald Trump chuan Egypt, Ethiopia leh Sudan water resources minister-te chu White House-ah a kawm a, an inhmuhkhawmnaah hian US Treasury Secretary Steven Mnuchin leh World Bank President David Malpass-te pawh an tel. 

Egypt president Abdel-Fattah el-Sissi chuan nikum September thla khan an buaina chungchang hi Trump hnenah a thlen a, Trump chuan an buainate chinfel thuai a nih theih nan US Treasury Secretary Steven Mnuchin chu tuikhuah siam chungchang thilthlai turin a ruat nghal a ni. Grand Ethiopian Renaissance tuikhuah hian megawatt (MW) 6,000 a pechhuak thei dawn a, he tuikhuah siamna atan hian US dollar tluklehdingawn 5 ruahman a ni. Siam zawh theih a nih chuan Africa rama tuikhuah lian ber tur a ni dawn a, khawvela tuikhuah lian ber pasarihna a ni bawk ang.