New Hampshire inthlanah Trump leh Sanders chak

US President thlanna neih tura party candidate thlanna, primary election chu New Hampshire-ah neih chhunzawm leh a ni a, Republican candidate zingah Donald Trump leh Democratic candidate zingah Senator Bernie Sanders-te an chak.

Primary election hi Iowa-ah vote thlak hmasak ber a ni. Iowa causus-ah hian Republican lamah Ted Cruz chakin, Democratic lamah Hillaray Clinton a chak a ni. Inthlan hi South Carolina leh Nevada-ahte neih leh a ni ang.

Republican candidate zingah Donald Trump hian vot 34% a hmu a, pahnihna John Kasich chuan 16% chauh a hmu pha. Pathumna chu Florida governor hlui Jeb Bush niin 12% a hmu a, Iowa caucus-a hnehna changtu Ted Cruz chu pali-na niin, vote 11% chauh a hmu pha a ni.

Democratic candidate zingah Senator Bernie Sanders chuan vote 57% a hmu pha a, amah dawttu Hillary Clinton-i chuan 41% a hmu.

Kum 69 mi, Donald Trump hian media lamah thawm a nei lian hle a, a thusawi tam tak pawhin sawizui a hlawh hle. Trump hian a campaign-naah an rama dan loa pemlutte thawn haw te, Mexico nena an inrina-ah a hungna bang siam te, US-a Muslim luh khapna siamte a tiam.

Democrats candidate Bernie Sanders hi kum 74 mi a ni a, mipuite sum lakluh inthlau lutuk tihreh te, a thlawna university education pek bakah an rama bank lian
ṭhendarhte a tiam bawk.

US President thlan turah han party pahnihte hian an party candidate chuh tumte zing aṭangin party presidential candidate tur an thlang chhuak ṭhin. State hrang hranga party candidate tur an thlan hi causus leh primary election tih a ni. Causus ah voter-ten meeting-ah candidate an duh hi ban pharin an thlang ṭhin a, mahse a thlang thei tur hi an party bika registered voter chauh an ni. Primary election hi state sorakrin a buatsaih a ni thung a, secret ballot hmangin vote lak a ni. Primary leh cause tin hian candidate an thlan tlinte tan hian palai, delegate an nei a, hengte hian July thlaa party convention-ah vote la lehin, party candidate tur an thlang chhuak ṭhin a ni.