China-ah Zika virus vei hmuchhuak

Latin America leh Caribbean rama leng mek, Zika virus chu a darh zel a, China ramah he hri vei hi hmuhchhuah a ni ve leh.

China National Health and Family Planning Commission chuan tunhnaia South Africa ram tlawha zin, Ganxian county-a cheng, kum 34 mi chu Zika virus a kai tih finfiah a nih thu a sawi. February 6 aṭang khan an khuaah damdawi-inah dah hran a ni a, tunah chuan a khawsik pawh a ziaawm tawh niin a tarlang.

Zika virus hi eng nge ?

Zika virus hi thosi chi khat, Aedes seh aṭanga kai theih a ni. Zika hri lanchhuah dan tlangpui chu khawsik, taksa thak, ruh chuktuah na leh mit sen te a ni. A natna hi a thawk chak lo a, a vei ṭhenkhat chu damdawi-in pan ngai khawpa nain an awm lo. He natna thihpui hi an la vang hle.

Hri veitu mi panga zinga pakhat vel chauhin an natpui a, a natna hi thosi-in a seh aṭanga ni 2-7 inkar chhungin a langchhuak ṭhin.

Zika virus hi kum 1947 khan Uganda rama zawngah hmuh a ni a, kum 1952 khan Uganda leh United Republic of Tanzania-ah mihringah hmuh a ni. Hemi hnu hian Africa, America, Asia leh Pacific-ahte hmuh a ni leh bawk.

Zika inkaichhawn theih dan :

Zika virus hi Aedes thosi seh aṭanga kai theih a ni a, he thosi vek hi dengue leh Chikungunya pu darhtu a ni. Heng thosite hian zan lam aiin chhun lamah mi an seh tam zawk. Nu naupai laiin a vei chuan a fa paiah a kai chhawn thei bawk. Hri hi thosi seh bakah, thisen aṭangin a inkaichhawn theih a, mipat hmeichhiat hman aṭangin inkaichhawn theih nia hriat a ni bawk.

Naupai laia Zika virus a vei chuan a fa chu pianphung pangngaiin a lu leh a thluak a te a, hei bakah hian a khaw≠hmuhna lamah pawh harsatna a thlen thei bawk nia sawi thar leh a ni. Ṭhenkhatah phei chuan mitdelna hial a thlen thei niin an sawi a, hei hi zirchian mek a ni.

Zika kai awlsamna hmun :

Ziak virus hi Latin America leh Caribbean ram 30 dawnah a darh tawh a, a hri veina rama cheng leh zinte tan kai a awlsam bik. Hei vang hian he hri lenna ramahte a ṭul bik a nih loh chuan zin lo turin mipuite ngenna pawh tih≠chhuah a ni.

Zika laka inven dan :

Zika virus hi a damdawi leh a venna, vaccine siam ala ni lo. Hei vang hian invenna ṭha ber chu in leh a chhehvela thosi pian theihna tui tling awmte tihbo a, thosi seh tur laka inven a ni. Thosi thahna hlo te hman a, thosi seh laka an him theihna atan nausen leh naupangte pawh an kut leh ke khuh thei tur thawm≠hnaw, rawng eng lam haktir tur a ni. Zanah thosilen zar ṭhin tur a ni bawk.

In enkawl dan tur :

Zika hri veite tan a enkawlna damdawi hran a la awmlo a, khawsik leh taksa na tihrehna tur nachhawkna lam chi ei a, chawlh hahdam a, tui in tam a ṭha. He hri vei tawhte chu a hnuah an vei nawn theih tawh lo nia hriat a ni.

World Health Organization chuan Zika hri darh zel tur venna atan kawng hrang hrangin hma a la mek a, a dam≠dawi leh hri venna siam tumin theih≠tawp chhuah mek a ni bawk.