US-in Afghanistan-ah sipai tirh belh dawn
US Army chuan Afghanistan chhim lama Helmand province-ah sipai tam zawk a tirh belh dawn. He bialah hian Taliban firfiakte chuan Afghanistan sorkar sipaite an nawr chep hle nia sawi a ni.
Sipai thupuangtu, Col Michael T Lawhorn chuan, kum 2014-a NATO mission tihtawp a nih hnua US sipai an dahluh tam leh berna tur a ni tih a sawi. Mahse US sipaite hi firfiakte nena indona hmunah an tel dawn lo a, Afghan sipaite chu an theih anga puiin training te an pe dawn a ni.
Lawhorn chuan sipai dah luh turte hi 2nd Battalion, 87th Infantry an ni tih sawii, anni hian Afghanistan-a US sipai lo awm sate chu an thlak dawn tih a sawi. Helmand province-a sipai dah luh tur zat tak hi a sawi lang lo.
US sorkar chuan Afghanistan-a a sipai dahte hi a tahtawlin a lachhuak a, kumin kumtawpah chuan sipai hi 5,500 chauh dah chhunzawm tum an ni tih a lo sawi tawh a ni. Mahse January thla khan he thutlukna siam hi ennawn a ngai niin sipai hotu chuan senator-te hnenah a thlen a ni.