Iran-in Israel hmar lam bei turin Hezbollah thu a pe : IDF

Israel Defence Force (IDF) chuan chhim lama Palestinian firfiak pawl, Hamas-te nena an inbeih mek karah, Iran chuan Israel hmar lam bei turin Lebanon-a militant group, Hezbollah-te chu thu a pe niin an sawi.

IDF thupuangtu, Brig. Gen. Daniel Hagari chuan nimin zinga press conference a neihah he thu hi a sawi a, chhim lamah Hamas nen an indo mekna aṭanga IDF-te tibuai turin Iran hian ṭan lo lain, Hezbollah-te hi thu a lo pe a ni, a ti. Hezbollah hian Iran thu hi a zawm a nih chuan, Israel-in a chhan letna chu a na hle dawn tih a sawi nghal bawk.

October 7-a Hamas firfiakte'n rocket hmanga Israel chhim lam an bei leh, Israel ram chhunga luta civil mi tam tak an thahnaah khan Iran hi a inhnamhnawih leh hnamhnawih loh chungchangah zawhna a tam hle.

Inkahhai an puang lo tih Israel PM-in a sawi

Gaza chhim lam bialah Israel-in inkahhai puan a remti nia sawi thawm a awm hnuah, Israel prime minister Benjamin Netanyahu chuan inkahhai puan chungchangah eng inremna mah siam a ni lo tih nimin khan a sawi.

Hetih lai hian Gaza chhim lam, Egypt nena an inrina, Rafah crossing chu hawn a nih theihna atan hma an la zel niin official-te chuan an sawi. Israel lam pawhin he crossing kaltlanga Gaza lama chhawmdawlna phurtu truck lutte chu beih lo an tiam nia tarlan a ni bawk.

US-in aircraft carrier pahnih a tir chhuak

Hamas-te'n Israel an beih hnu leh, Israel-Hamas indona a thlen hnua Israel ram a thlawp thu a sawi hnuah, US chuan Mediterranean khawchhak lamah aircraft carrier pahnih a tir chhuak a, pakhat chuan a thleng tawh.

Kar hmasa khan Gerald R.Ford carrier leh a zuitu lawng dangte chuan Mediterranean hi an thleng. Fort hi US aircraft carrier thar niin, khawvela a lian ber a ni a, sailor 5,000 chuang an tel. He carrier hian military aircraft 75 chuang phur theiin, fighter aircraft leh F-18 Super Hornet jet leh E-2 Hawkeye pawh a phur tel. Drone leh aircraft lo kap thla thei tur, medium range surface-to-air missile, Evolved Sea Sparrow Missile pawh a kawl tel a ni.

Dwight Eisenhower carrier pawhin Mediterrean lam a pan mek a, kar khat hnu velah a thlen rin a ni. He nuclear powered carrier hi US chuan Iraq-a beihpui a thlak ṭum pawh khan a lo hmang tawh a ni. 'Ike' tia sawi a ni bawk a, sialor 5,000 awmin, aircraft squadron 9 a phur thei. Ike pawh Ford ang bawkin lawng dang eng emaw zatin an zui dawn a, heng zingah hian guided-missile cruiser Philippine Sea, guided-missile destroyer Gravely leh Mason-te an tel.