Finland President hlui leh Nobel Peace laureate Ahtisaari a thi

Finland President hlui, Nobel Peace Prize pawh lo dawng tawh, Martti Ahtisaari chu nimin khan kum 86 mi niin a thi.

Ahtisaari hi kum 1994 - 2000 chhung khan Finland ram hruaitu niin, President 10-na a ni. Kosovo, Indonesia leh Northern Ireland-a buaina chhuaka remna leh muanna a awm theihna atana a hma lakna avangin kum 2008 khan chawimawina ngaihhlut, Nobel Peace Prize hi hlan a ni. Remna leh muanna duhtu a nih avang hian ngaihhlut pawh a hlawh hle. Inbiakna hmanga buaina chhuak tur veng leh dang tura hma la tur, Crisis Management Initiative pawh a din a ni.

Kum 2021 aṭang khan Alzheimer natna a vei tih hriat a ni. Hun rei tak enkawl a nih hnuah nimin khan a thi ta a ni. A nupui Eeva leh fapa pakhat a kalsan. State chawimawina nena vuiliam a ni dawn a, a vui hun tur hi an la puang lo.