Aleppo aṭangin mi 50,000 tlanchhia

Syria rama Aleppo province-a inbeihna thleng avangin mi 50,000 chu hmun him lamah an tlanchhe tawh niin International Committee of the Red Cross (ICRC) chuan a sawi.

ICRC thuchhuah chuan Aleppo bial chhung dinhmun pawh a chhe sawt hle tih sawiin, khawpui chhunga tui supply pawh tihtawp a ni tawh a ni, a ti.

Aleppo bialah hian Syria sorkar sipaite chuan sorkar laka helte lakah beihpui an thlak a, Russia-in thlawhtheihna hmangin sipaite hi puiin bomb a thlak bawk a ni. Aleppo beih vanga Syria mi tlanchhiate hi Turkey chuan a ram chhungah luh phalloin ramri a khar a, hei vang hian ramri-ah mi 30,000 vel an tangkhang mek a ni.

Thuchhuah siamin, ICRC chuan Aleppo khawpui tana mamawh chawkluhna kawngpuite chu khar a nih avangin khawpuia cheng civil mite dinhmun chu a chhe hle niin a sawi. "Ei tur leh tui thianghlim an nei tlem tawh a, awmna mumal an nei tawh lo bawk. Khaw vawt karah mipuite chuan dam khawchhuak tumin theihtawpin an bei mek a ni" a ti.

Turkey chuan kum nga kalta chhung khan Syria raltlan maktaduai 2.5 chuang a la lut tawh tih sawiin, raltlan hi a dawn theih tur aia tam a enkawl tawh a ni. Hei vang hian raltlan laklut tur pawh hi khuahkhirhna mumal tak hnuaiah chauh kalpui a tum tawh tih a sawi. Hetihlai hian ramriah raltlan tam tak an tangkhang mek avangin ram hrang hrangte chuan a ramri hi hawng turin Turkey hi an nawr mek a ni.

Syrian Observatory for Human Rights chuan Aleppo-a beihpui thlakna-ah hian mi 500 chuang an thi tawh a, an zingah hian civil mi tam tak an tel niin a sawi.

US chuan Syria sorkar leh Russia chu helho laka beihpui an thlak mek titawp turin a ngen a, sorkar leh helpawlte chu inkahhai puang turin a ngen a ni. Russia chuan inkahhai hi March 1 aṭanga puang turin a rawt a, hei hi US chuan duh loin, inkahhai hi puang nghal turin a phut. Mahse Aleppo-a inbeihna thleng mekah hian US chuan a sipaite inrawlh tir a tum lo tih a sawi. US sipai thupuangtu, Col Steve Warren chuan, "Aleppo biala thil thleng hi a ṭha lo hle tih kan hria. Mahse tuna kan tum ber chu Islamic State (IS) firfiak te hneh a ni a, an ni hi kan bitum ber pawh an ni" a ti.

Warren chuan Syria sipai leh Russia-te beihpui thlakah hian Aleppo khawpui damdawi-in lian pahnih chu a chhe tel a, hei vang hian mi 5,000 vel chuan damdawi lam enkawlna an dawn theih loh phah niin a sawi. Aleppo khuaah hian mi maktaduai 3 vel an cheng a ni.

United Nations pawhin Russia chu Aleppo-a beihpui a thlakte titawp turin a lo ngen tawh bawk a, nimin khan Munich-ah ram 17 aiawhte chuan meeting neiin, Syria tualchhung dinhmunte an ngaihtuah ho a ni.