Netanyahu-an Israel ram hung a duh

Israel Prime Minister Benjamin Netanyahu chuan Israel ram pum chu hung a duh thu a sawi a, hei hi Palestinian leh Arab ram aṭanga an ram beih tuma lut ṭhinte laka venna atan a ni, a ti.

PM Netanyahu hian an ram chhim lam a tlawh ṭumin an ram hung a duh thu hi a sawi. Israel ram pum hung a nih chuan Gaza aṭanga Hamas firfiakten leiverh hmanga Israel-a an luhruk ṭhin pawh a dang thei dawn niin a sawi bawk.

Ramri hung a ngaih thu a sawinaah Israel PM chuan, " Kan ṭhenawm ramsa hlauhawm takte lak aṭanga kan invenhimna hi a ngai a ni" a ti. Israel sorkar chuan a ram luah, West Bank kaltlanga indaidanna bang an siama awng la awmte pawh khar phui dan a ngaihtuah mek tih a sawi.

Indaidanna bang siam hi Prime Minister hlui Ariel Sharon hun laia duan a ni a, Palestinian miten Israel mite laka an beih ṭhin tihtawp tuma hmalakna pakhat a ni. Kum 2003 khan West Bank-a indaidanna bang hi siam a ni a, km 800-a thuiah, meter 6-a sangin hungna bang hi siam a ni. Bang hi hmun ṭhenkhatah concrete-a siam niin, hmun ṭhenkhatah chuan thirlen dahin, current kaltir a ni thung.

West Bank hungna bang siam hi Israel lamchuan 'venhimna bang' tiin a sawi a,mahse Palestinian lam chuan 'inthliarhranna bang' tiin an sawi thung. West Bank chhung leh ramri-ahte hian military checkpoint tam tham siam a ni bawk.