Syria-a inkahhai puan rel

Syria ram tualchhung buaina chinfel dan ngaihtuaha Munich, Germany-a ram hrang hrang hruaitute inhmukhawm chuan Syria sorkar leh helpawlte inkarah inkahhai puan a nih theih nan hmalak an rel.

Inkahhai puan a nih theih nan a rang thei ang bera hmalak an rel a, mahse, hei hian US leh a sangawizawnpui ten Islamic State (IS) leh al-Nusra Front firfiak pawl laka beihpui an thlak mek a huam lo ang.

International Syria Support Group minister kalkhawm chuan Syria tualchhung indona tuarte tana chhawmdawlna tam zawk pek luh an rel bawk.

Meeting zawha press conference an neihah, US Secretary of State John Kerry chuan inremna chu ziak chauha siam a la ni tih sawiin, a taka kalpui a nih thuai a beisei thu a sawi.

Mahse Russia Foreign Minister Sergei Lavrov chuan Russia-in Syria rama thlawhtheihna hmanga beihpui a thlak mek chu a tihtawp dawn loh thu a sawi a, IS leh al-Qaida nena inzawmna nei helpawlte chu a bei chhunzawm zel dawn tih a sawi. Hetihlai hian US leh Europe ramte chuan Russia hian beihpui a thlaknaah firfiakte chauh ni lo, Syria President Bashar al-Assad-a kaihhruai sorkar laka helte pawh a bitum tel niin an puh. Tun hnaiah Russia puihnain Syria sipaiten Aleppo province-a sorkar laka helte an beih avangin he bial chhunga cheng mi sing tel chu himna zawngin an inthiarfihlim tawh a ni.