SKorea-in factory park-a power supply ti tawp

South Korea chuan nimin khan North Korea-a ram pahnihte thawhdunna, Kaesong industrial park-a tui leh power supply a titawp.

North Korea-in ramdangten ti lo tura an ngenna ngai pawimawh lo leh, United Nations Security Council-in a hrekna palzuta long range rocket a kahchhuah leh avangin SKorea chuan a lungawi lohna lantirna atan Kaesong complex-a an ram company awmte hnathawh chu a titawp a ni. Hemi chhan letna atan hian Ningani zan khan NKorea chuan he complex-a SKorea mi hnathawka awmte chu an ram
aṭangin a chhuah tir vek a ni.

NKorea aṭanga an ram mi hnathawka awmte hnawhchhuah an nih avang hian nimin khan SKorea chuan industrial park-a tui leh power a supply chu a titawp ve leh bawk.

SKorea Unification Ministry chuan hnathawkte an thawh lailawk lai pawh zawhfel tir phalloa hnawhchhuah an nih vang hian park-a power supply chu an titawp nghal tih a sawi a, power tihtawp anih vang hian tui supply pawh a tawp ve nghal a ni.

Hetihlai hian NKorea-a Committee for the Peaceful Reunification of Korea chuan South lamin Kaesong park-a an company-te an khar chu indo puanna anga an ngaih thu sawiin, 'North leh South inlaichinna tihtawpna angah kan ngai a ni" a ti. Kaesong-a South Korea company-te thil neih chu khawih chet theih loha dahsakaha vau bawk.

NKorea hian South lena an inbiakpawhna pawimawh, hotline pahnih pawh khar a tum thu a sawi. Kum 2013 khan North hian communication hotline-te hi a lo titawp tawh a, mahse, an inkar boruak a ṭhat hnuah a hawng leh a ni.

Hotline-te hi ram pahnihte inkar boruak ṭha lo siamṭhatna tana ruahman a nia , pakaht hi sipaiten hmangin a dang pakhat hi Demilitarized Zone, Panmujom-a UN Command-te nena inbiakpawhna atana hman a ni.