Suu Kyi-i veng turin special unit pe

Myanmar rama sorkar thar siamtu tur, National League for Democracy (NLD) hotu Aung San Suu Kyi-i chu thaha vauna a tawh avangin vengtu tur, police special unit pek a ni.

Myanmar ram danpui hnuaiah ramdang mi nupui pasala nei leh an lak fa neite chu an ram President dinhmun an luah khap a ni. He danpui hi sipai rorelna hnuaia an awm laia siam a ni a, NLD hian thuneihna an chan hunah Suu Kyi-i hi president a nih theih nan he dan hi siamṭhat an tum thu an sawi.

Suu Kyi-i vautu, Ye Lwin Myint hian a vauna thu hi Facebook-ah a tarlang a, ram danpui an thlak danglam a nih chuan a thah tur thu a sawi a, silai a keng lai thlalak a tarlang tel bawk.

Police hotu chuan Suu Kyi-i vauna thu ziak a hmuh veleh police-te hnenah venhimna pe tura a hrilh nghal thu a sawi. Facebook-a thu post-tu hian thu ziah hi a hnuah delete-in ngaihdam a dil leh a, mahse police-te chuan he thil hi a la thutak hle tih a sawi.

Suu Kyi-i hian venhimtu hran a nei a, police special unit pek belh ni mah se heng mite pawh hian an la ven chhunzawm zel dawn a ni.