Mexico jail-a buaina chhuakah mi 52 an thi

Mexico hmarlam, Monterrey-a jail chhungah buaina a chhuah avangin mi 52 an thi a, mi dang 12 in hliam an tuar. Buaina chhuahna hmun hi Topo Chico jail a ni a, jail-a tang zinga pawl pahnihte an intibuai a ni.

Nuevo Leon state Governor Jaime Rodriguez chuan Ningani zan khan tangte hian hmanrua an hmuh thei ang ang, tiang leh lung hmangin an inbei a, storage room an hal bawk niin a sawi. Buaina a chhuah chhan tak erawh sawilan a ni lo.

Rodriguez chuan buaina siamtute hi Zetas drug cartel, Juan Perdo Zaldivar Farias-a kaihhruai leh Jorge Ivan Hernandez Cantu-a kaihhruai Gulf cartel mite an nih thu a sawi. Thi te hi an vaiin mipa an ni a, hliam tuar zinga mi panga chu an dinhmun a ṭha lo hle tih a sawi bawk. He jail-a tang dangte chu hmun dangah sawnchhuah nghal an ni bawk.

Jail chhunga buaina a chhuah thu hriat a nih hnu hian nimin zing khan tang chhungte tam tak chuan Topo Chico jail hi an pan khawm a, jail thuneitute hnenah thil thlen dan kimchang hrilh turin an phut. Hemi hnu hian official-te chuan jail bangah buaina chhuak vanga thi hming hi an tarchhuak a ni.

Mexico ramah jail hrang hrangte hi an tawt hle a, jail 389 zinga 70% chuangah chuan awm thei tura ruahman aia tam an awm bakah, inrelbawlna pawh a ṭha lo hle niin national security commissioner chuan a sawi. National Human Rights Commission chuan an ram chhunga jail hrang hranga mi 203,000 tan theihna turah mi 254,700 an tang mek niin a tarlang.