NKorea-in Kaesong-a thawkte hlawh hmansak : SKorea

South Korea chuan North Korea chuan ram pahnihte enkawl dun, Kaesong industrial park-a hnathawkte hlawh 70% zet a hman sak a, hei hi an ram hruaitu Kim Jong Un bungrua man to tak tak leina atan leh, ralthuam siamna program kalpuina atan a hmang niin a puh.

SKorea chuan industrial park-a hnathawkte hlawh pek tur chu NKorea lam hian a lo lak pen sak ṭhin niin a sawi. Kaesong complex-ah hian North Korea mi 55,000 vel an thawk a, heng mite thla khat hlawh hi dollar 160 ni mah se, an hlawh hi an hmu tlem thei hle nia sawi a ni.

February 7-a NKorea-in long-range rocket a kahchhuah avang khan SKorea chuan a hremna atan Kaesong complex-a an hnahawh hi a titawp a, NKorea mi hnathawkte hlawh tur pawh thil dang atana pawhpen a remti tawh dawn lo tih a sawi.

Kaesong complex-a SKorea company awmte khar an nih avang hian NKorea chuan complex-a SKorea mi hnathawkte awmte chu an ram chhuahsan turin a ti ve nghal a, South lam thiltih dan chu an laka indo puang anga an ngaih thu an sawi. Hei vang hian kar kalta Ningani khan complex-a SKorea mi hnathawka awmte chu a hnawtchhuak a, SKorea firm-te thil neih pawh khawih chet theih lohin a dahsak nghal a ni.

South Korea Unification Ministry chuan nimin khan thuchhuah siamin, "North Korea mi hnathawkte hlawh leh fee dangte hi US dollar-in pek an ni ṭhin a, an hnenah pe loin North thuneitute kutah hlan ṭhin a ni. Mahse, heng sumte hi thil dang atan thuneitute hian an lo hmang peng ṭhin nia hriat a ni" a ti. Hnathawkte hlawh pek chu NKorea-a rorellai, Worker's Party office 39 leh agency dangten an buaipui zui ṭhin.

Kaesong industrial park atan hian South Korea sorkar leh company te chuan dollar maktaduai 829 zet an invest niin Unification Minister Hong Yong-pyo chuan a sawi.