Zika virus do hna thawk turin sipai tir

Brazil sorkar Zika virus leng mek do let hna thawk turin sipai nuai hnih chuang ramchhung hmun hrang hrangah a tir chhuak. Sipaite hian mipuite hnenah Zika virus chungchang hriattirin, inven dan te an hrilh darh dawn a ni.

Brazil ramah hian Zika virus-in a thlen nia hriat, nau piang thar zinga pianphung dik lo, mi pangngai aia lu te, microcephaly 462 an awm tih finfiah a ni tawh a, mi dang 3,852 chungchang pawh zirchiang mek a ni bawk.

President Dilma Rousseff-i chuan an rama hri leng mek chuan August thlaa Olympic Games an thlen tur a tibuai dawn lo tih a sawi.

Brazil sipaite hian in tinah kalin, thosi chi khat Aedes aegypti sehin Zika virus a thlen theih dan leh, inven dan tur ziahna lehkha an sem bakah, an sawipui nghal bawk.

World Health Organization (WHO) chuan Zika virus leh micracephaly inzawm dan hi zirchiang mek anih thu leh, kar reilote hnuah hriatfiah theih beisei a nih thu a sawi.