US lakah China media lungawi lo

US Senate Bill 2451 chuan Chinese human rights activist, Nobel Peace Prize pawh lo dawng tawh, Liu Xiobo hming chawia Chinese Embassy awmna hming thlak a rawt a, hei hian China media-te a ti thinur hle.

Liu Xiaobo hi China sorkar kalphungte sawisel a, lungawi lohna a lantir avangin man a ni a, kum 11 tang tura thiam loh chantir a ni. Nobel Prize pek a nih pawh hian amahin a dawng thei lo a ni.

Senate Bill hi Republican presidential candidate Senator Ted Cruz-a rawt a ni a, a taka tipuitling tur chuan House of Representative-in a pawm leh, President-in a hming a ziah hnan phawt a ngai dawn a ni. He bill hi pawm a nih chuan US-a Chinese Embassy official address chu '1 Liu Xiabo Plaza' tih a ni tawh ang. Tuna a address chu 3503 International Plae tih a ni.

China rama rorellai party, Communist Party hnuaia 'Global Times' chanchinbu chuan US chet dan chu China tihthinur tumna a ni, a ti. Mahse China sorkar chuan hemi chungchangah hian sawi a la nei lo.

Bill puluttu, Ted Cruz chuan mihring dikna chanvo humhalh a nih theihna atana beitu, Liu Xiaobo an thlawpna lantir nan Senate-in lungrual taka bill a pass chu lawmawm a tih thu a sawi. Hetihlai hian White House thupuangtu chuan, "China sorkar hnenah mihring dikna chanvo neihte zah sak a, Liu Xiaobo leh politics avanga tangte chhuah zalen turin kan nawr reng a ni. Hetihlaia Senator Cruz-a Washington DC kawtthler hming thlak a rawtna hi thil ṭha tak niin kan ngai lo" a ti. Bill hi House of Representative hian pawm mah se, President hian a veto hmangin a lo hnawl thei a ni.