US President Biden-a'n Israel a tlawh dawn

Israel leh Palestinian firfiak pawl, Hamas-te indona thleng mekah US president Joe Biden chuan Israel a thlawpna lantirna ni pahin Israel ram a tlawh dawn.

President Joe Biden hian nimin khan Israel hi panin, Israel prime minister Benjamin Netanyhu a hmu dawn a, Gaza Strip-a Hamas-te laka beihpui an thlak mekah, khawmual aṭanga hma lak an tum dante a zawt ang. Israel sipaite chu Hamas-te an beihnaah, civil mite tawrhna thlen tlem thei ang tura ruahmanna an siam theih dan turte pawh a sawipui ang.

Israel a tlawh hnuah Biden hian Jordan panin, an ram lal, King Abdullah bakah Egypt president Abdel Fattah al-Sisi leh Palestinian Authority president Mahmoud Abbas-te a hmu leh dawn a ni. US secretary of state Antony Blinken chuan Thawhṭanni khan Israel hi a lo tlawh tawh bawk a, kar khat chhungin ṭum hnih a tlawh tawh a ni.

Israel-in an ram aṭanga Gaza luhnate a khar vek hnuah, Lebanon leh Gaza inrina, Rafah crossing kaltlangin Gaza-a chhawmdawlna thawn luh chu an phalsak tawh a ni. Ramri bulah hian truck 160 vel zet an awm tawh nia sawi a ni. Rafah crossing hi Egypt leh Gaza inkalpawhna awmchhun niin, ramri hawn leh hawn loh chungchangah Egypt lam chu a thuneitu a ni a, hemi rual hian he ramri kaltlanga Gaza-a bungrua leh thil dang phurh luhna turah Israel sorkarin a pawmsak a ngai thung.

Israel leh Hamas-te indona thleng avang hian Thawhlehni khan European Union chuan emergency summit a nei. He indona thleng hian Europe pawh a nghawng theih tur thu leh, raltlan pawh an pun chhoh nasat tur thu an sawi.

Germany chancellor Olaf Scholz pawhin Thawhlehni khan Middle East-a buaina a punlun zel lohna turin, Lebanon-a militant group Hezbollah leh Iran ramte chu Israel-Hamas buainaah lo inrawlh lo turin a ti.

Israel cyber expert-te an che chhuak

Hamas firfiakte'n October 7-a Israel an beih hnuah Israel mi eng emaw zat chin hriat lohin an awm a, heng mite awmna zawn chhuah kawngah Israel cyber expert-te'n sorkar an pui dawn.

Israel high-tech expert za tel chuan an mimal hna kalsanin, Israel mi chin hriat loha awmte zawng chhuak tura hna thawk turin an inpe a, hemi atan hian 'war room' an siam.

War room-a an hotu, Karine Nahon chuan expert-te hian footage hrang hrang an zir chiang mek a, heng zingah hian Hamas-te'n online-a video an post-te pawh a tel tih a sawi. Hamas-te'n an beih hnua Israel mi chin hriat loha awm mi hi 1,000 chuang an tling niin a sawi.

Tel Aviv khawpui pawnah vonuteer-te hian makeshift command centre an siam a, hetah hian artificial intelligence, facial leh voice recognition hmangtein mi bote awmna hi chhui chhuah an tum dawn a ni.