Kim Jong-Un an satellite tam zawk kahchhuah tiam

North Korea ram hotu, Kim Jong-un chuan kar kalta-a long-range rocket an kahchhuah avanga ram hrang hrangte sawiselna an tawh mek laiin, satellite tam zawk kahchhuah chhunzawm zel a tiam.

February 7-a hlawhtling taka Kwangmyongsong-4 satellite kahchhuah a nih lawmna inkhawm hi kar kalta Inrinni khan rorellai, Workers' Party chuan buatsaih a, he hunah hian Kim chuan satellite kahchhuah a nih theih nana thawktu, scientist, technician leh official-te chu lawmpuina a hlan a, a dang pawh an kahchhuah zel tur thu a sawi. Inkhawmah hian sorkar mi pawimawhte an tel ṭha hle.

Kim chuan long-rang rocket an kahchhuah chuan an ram mipuite hnenah huaisenna leh inrintawkna a pe a ni tiin, an ram hmasawnna dal tumte an vauna a nih thu a sawi. Kim chuan an hmelma ramten NKorea chu che thei loa hrekbeh an tum avangin rocket kapchhuak tur hian thutlukna pawh an siam phah nin a sawi a, tam zawk an kapchhuak leh dawn tih a sawi.

Long range rocket a kahchhuah avang hian United Nations Security Council chuan NKorea hrekna na zawk siam a tum a, South Korea pawhin a lungawi lohna lantir nan NKorea nena an thawhdunna, Keasong industrial complex-a a hnathawhte a titawp. Hemi chhan let nan NKorea chuan factory-a South Korea mi hnathawka awmte chu a hnawtchhuak vek a ni.