Obama'n Syria helho bei tawh lo turin Russia ngen

US President Barack Obama chuan Russia chu Syria President Bashar al-Assad-a laka helte laka beihpui a thlakte titawp turin a ngen.

Syria sipaite hian Russia puihnain Aleppo bialah sorkar laka helte an bei meka, mi tam tak himna zawngin an tlanchhe tawh a ni. Kar kalta Zirtawpni khan Munich-ah khawvel ram hrang hrang hruaite chuan Syria sorkar leh helpawlten inkarah inkahhai puan an rel a, mahse he inremna hi tunkar tawp lamah chauh hman theih rin a ni.

Russia Parliament chuan President Vladimir Putin leh Obama-te chu Pathianni khan telephone-a inbiain, Munich-a inremna siam hi tihpuitlin a nih theih nan thawhdun an remti niin a sawi. He tih lai hian Russia chuan Syria-a Islamic State (IS) leh firfiak pawl dangte laka behpui thlak chu a chhunzawm zel tur thu a sawi.

Russia chuan a beihpui thlaknaah IS leh Al-Qaida nena inzawnma Nusra Front firfiakte chu a bitum ber niin a sawi a, mahse khawthlang ramte chuan President al-Assad-a dodaltute a bitum zawk niin an saiw thung.