Haiti President lailawk tur thlang

Haiti President aṭanga Michel Martelly a ban hnuah kar khat chuang President nei loin an awm a, Pathianni khan parliament chuan president lailawk atan Jocelerme Privert a thlang.

President hna lo chelh lailawk tura thlan, Jocelerme Privert hi National Assembly hruaitu ni lai a ni a, he hna hi thla li chhung a chelh ang.

Nikum November thla khan Haiti President hi thlan a ni a, mahse candidate zingah tling tura vote hmuh ngai zat hmu pha an awm loh avangin a vote hmu sang pahnihten inthlan thawh hnihna an hmachhawn a ngai a ni.

Inthlan thawh hnihnaah hian rorellai candidate Jovenel Mosise leh eptu Jude Celestin-ten President dinhmun hi an inchuh dawn a ni. Inthlan nawn hun tur hi ruat ṭhin mah se, eptu lam hian November thlaa inthlan neihah khan thil dik tawk lo a awm nia sawiin, election lama thuneitute chu Mosie duhsaka an puh avangin lungwn lohna an lantir a, hei vang hian vote thlak hun tur pawh hi
ṭum hnih sawn a ni tawh.

Interim President atana thlan a nih hnua thu a sawiah, Privert chuan an ram chhung dinhmun siamṭha a, hun rei tak tihkhawtlai tawh President thlan thawh hnihna chu a rang thei anga bera buatsaih a tum thu a sawi. Ruahman lawk ang chuan President thar hi April 24-ah thlangin, May 14-ah rinawmna thu tiamtir lakluh a ni ang.