Boruak bawlhhlawh vangin kumtin mi mtd nga chuang thi

Khawvel ram hrang hrangah boruak bawlhlawh vangin kumtin mi maktadui 5.5 chuang an thi a, heng zinga a zahve aia tam hi China leh India rama cheng an ni.

American Association for the Advancement of Science (AAAS) meeting neihah ram hrang hrang scientist-te chuan an thil zirchianna hrang hrangte an tarlang a ni.

University of British Columbia researcher, Michael Brauer chuan, "Boruak bawlhhlawh hi mihringte thihna thlentu lian ber pali-na a ni" a ti. Boruak bawlhhlawh aia mihring thihna thlentu tam zawkte chu BP sang, ei tur ṭha nei lo leh vaihlo a nih thu a sawi.

Brauer chuan, "Khawvela mihring zinga 85% aia tam chu World Health Organisation-in mihring tana him chin tia bithliah aia boruak bawlhhlawhna hmunah an cheng a ni" a ti.

Khawvela mihring tamna ram pahnih, China leh India chu boruak bawlhhlawh zualna ram an ni. China ram boruak tibawlhhlawhtu ber chu lungalhthei hal khu a ni a, India ramah chuan ram hal khu bakah thing hmanga eirawngbawlna khu te chu a tibawlhhlawhtu zingah an tel. Scientist-te chuan India ram boruak chu bawlhhlawh belh zel hlauh≠awmin a awm tih an sawi bawk.

Boruak bawlhhlawh tiziawm tura hmalak a nih thuai loh chuan thihpui zat hi an la pungchho zel dawn niin scientist-te chuan an sawi.