Dutch Minister-in ramri khar lo turin EU ngen

Netherlands Foreign Minister Bert Koenders chuan European Union member ramte chu raltlan leh pemluh tumte tana an ramri-te khar lo turin a ngen a, ramri khar ai chuan khuahkhirhna mumal tak siam zawk turin a ti.

EU President dinhmun hi member ramte hian thla ruk danah an inchelh chhawk ṭhin a, Netherlands hian president dinhmun hi a chelh mek a ni. Minister chuan Macedonia khawpui, Skopje-a chanchin thar lakhawmtute a kawmnaah, raltlan leh pemlutte avanga Europe ramten harsatna an tawh mek chungchang chinfel dan ngaihtuahin Austria, Macedonia leh Greece ram hruaitute pawh a be chhunzawm zel dawn tih a sawi.

Koenders chuan pemlutte zingah hmeichhia leh naupangte dinhmun chu ngaihsak an ṭul thu a sawi bawk.