Syria-a hospital leh school beihnaah mi 50 an thi

Syria hmarlama Syria sipai leh a thurualpuiten helho laka beihpui an thlaknaah Thawhṭanni khan hospital panga leh school pahnih chu missile hmanga kah an ni a, mi 50 an thih bakah mi tam takin hliam an tuar.

United Nations Secretary General Ban Ki-moon chuan hospital leh zirna in beih a nih chu international law palzutna dik tak a ni tiin a dem thu a sawi.

Missile-a kah fuh zingah hian Idlib province-a Maaret al-Numan khuaa damdawi-in, charity pawl Doctors Without Borders (MSF) enkawl mek pawh a tel. MSF chuan hospital hi a chhe nasa hle a, mi pasarih an thi a, chin hriat lohin mi pariat an awm bawk niin a tarlang. MSF hotu chuan, "Hospital kaptu hi chu Syria sorkar a nih loh pawhin Russia an ni" a ti.

MSF Syria operation chief Massimiliano Rebaudengo chuan, "Hospital kahchhiat a nih avang hian khawchhunga cheng mi 40,000 vel chuan damdawia enkawlna mumal an dawng thei dawn lo a ni" a ti. He province-a Maarat Al-Nouman ah National Hospital chu kah fuh a ni bawk.

Aleppo province-a Azaz khuaa hospital chu rocket hmanga kah a ni bawk a, mi 14 an thi a, mi dang 30 velin hliam an tuar. He khuaa raltlante awmna school pawh kah a ni.

Hospital leh school kaptute hi sawi lang lo mah se, hmarlama Aleppo bialah hian Syria sipai leh Russia chuan Syria sorkar laka helho lakah beihpui an thlak mek a, hei vang hian anmahni kah nia rin a ni. He thil thleng hi 'war crime' dik tak a ni tiin France leh Turkey-te chuan an sawi. Russia chuan an puhna hi a la chhang let lo.

Aleppo biala beihpui thlak avang hian civil mi 50,000 chuan in leh lo an chan tawh a, an zinga tam tak chu Turkey rama tlanchhiat tumin ramri bulah an awm mek a ni.

Turkey Prime Minister Ahmet Davutoglu chuan hospital leh school beih a nih chu a dem thu sawiin, Russia a vau let nghal bawk. "Russia hi firfiak pawl ang maia a chet chhunzawm a, civil mite hlauhlawp leh tlanchhiat ngaia a siam chhunzawm zel a nih chuan na takin kan chhang let ve tawh ang" a ti. Hetihlai hian Turkey chuan Aleppo province-a Kurdish bial eng emaw zat chu a bei. Turkey chuan Kurdistan Workers Party (PKK) chu hun rei tak an ram tihbuai tuma cheah a puh a ni.