Israel PM hlui jail-ah tantir

Israel Prime Minister hlui Ehud Olmert-a chu eiruk thubuaia thiam loh chantir a, thla 19 tang tura hrem a nih angin Thawhṭanni
aṭang khan Ramle khuaa Maasiyahu jail-ah dah a ni. Israel PM hlui zinga jail-a dahluh hmasak ber a ni.

Kum 70 mi Olmert-a hi thamna laa puhin kum 2015 May thla khan thiam loh chantirin kum ruk tang turin a ti a, mahse nikum December thla khan Israel supreme court chuan a tan hun hi kum ruk aṭangin thla 18-ah a tihhniam sak a ni.

Olmert hi Maasiyahu jail-a bloc 10-ah dah a ni a, a tanna pindan hi 'VIP wing' tia sawi a ni. Bathroom hran neiin, TV a kawl thei a, public telephone a hmang thei bawk ang. Library leh sports equipment-te pek a ni bawk a, mahse a cell hi midang nen an inṭawm dawn a ni.

Thamna sum laa puh a nih hun hi kum 2006 niin, hetihlai hian Olmert hi prime minister a nih hma, Jerusalem mayor a nih laia mi a ni. Jerusalem-a real estate project siamna tur atan thamna hi a la nia sawi a ni. Dik lo taka sum laa puh a nih avang hian kum 2009 khan Prime Minister a nihna aṭangin a ban phah bawk.

Thawhṭanni-a jail-a dahluh a ni hma lawkin Olmert hian video a tichhuak a, hetah hian an puhna lakah a fihlim thu a la sawi a, an rama remna leh muanna a awm theihna tana a hmalaknate hriatsak turin Israel mipuite a ngen bawk.

Olmert chuan, " Eiru-a min puhna te hi a dik lo tih ka sawi duh a ni" tiin, Prime Minister a nih chhunga dik leh rinawm tak a thawhna te, an ram miten dinhmun ṭha zawk an neih theihna atan leh boruak muanawm a awm theihna tura a hnathawhte chu an hriat zui zel a beisei thu a sawi.