SKorea-in nuclear program titawp turin NKorea vau

South Korea President Park Geun-hye chuan North Korea chu nuclear program a kalpui mek titawp turin a vau a, a titawp lo a nih chuan an ram chu a tlukchhiat phah dawn a ni, a ti.

Nimina Parliament inkhawma thu a sawiah, President Park-i chuan NKorea-in long-range rocket a kahchhuah avangin Korea ram pahnihte thawhdunna, Kaesong industrial park an khar chungchang sawifiahin, "He thil hi nuclear program titawp tura chak zawka NKorea nawrna tur leh awmze nei tur a ni" a ti.

Kaesong complex-a North Korea mi hnathawkte hlawh atana sum pek chu NKorea sorkarin pawhpen sakin, nuclear program kalpuina atan a hmang niin South chuan a lo puh tawh bawk. Park-i chuan kum 1999 aṭang khan South chuan North sorkar leh civil mite chhawmdawlna atan US dollar tluklehdingawn thum aia tam an thawn tawh tih a sawi. Hetihlai hian US chuan NKorea nawrna kawng khat atan nuclear ralthuam phur thei, F-22 stealth fighter pali chu SKorea-ah tirh a tum. F-22 fighter pali-te hi vawiin hian Korean peninsula-ah thlawh tirin, hei hi US leh SKorea sipaite thawhdunna ṭhat zia lantirna kawng khat atana tih a ni bawk. F-22 fighter hian nuclear missile leh bomb-te a phur thei a, radar laka him thei tura duan a ni.