Gaza City Hospital beihnaah mi tam tak thi: Hospital beituah Palestinian leh Israel an inpuh tawn

Gaza City-a hospital chu nimin khan beih a ni a, Palestinian mi tam tak an thi. Thi zat chiah hi hriatchian a la ni lo. Hospital beih a nih chungchangah Palestinian leh Israel chu pawikhawihtuah an inpuh tawn.

Palestinian official-te chuan Israel-in al-Ahli Arab Hospital a beihnaah hian mi 500 vel an thi niin a sawi a, Palestine president Mahmoud Abbas chuan hospital beih tel a ni chu a dem thu leh, pawikhawihna rapthlak tak a nih thu a sawi.

Hetih lai hian Israel lam chuan hospital beitu an nih loh thu an sawi a, Israel prime minister Benjamin Netanyahu chuan, "Khawvel pumin Gaza hospital beitu hi Israel Defence Force (IDF) ni loin, Gaza-a firfiak rawng tak takte thiltih a ni tih an hriat a ngai a ni," a ti. IDF thupuangtu Brig. Gen. Daniel Hagari pawhin Islamic Jihad member-te'n pawikhawihtu an ni tih an sawina audio recording pawh a tichhuak bawk. Hamas-te chuan Palestinian rocket hmanga beih a ni ngei tih pawh an hre reng a ni, tiin a sawi.

United Nations secretary-general Antonio Guterres chuan Israel-Gaza war thleng mekah, indona tuartu mipuite chhawmdawlna pek an nih theihna atana inkahhai puang thuai turin a ngen. Hamas firfiakte chu an mi mante chhuah tur leh, Israel pawh Gaza-a chhawmdawlna thawn luh phalsak thuai turin a ngen. He mi atan hian inkahhai puan hi a ṭul a ni, a ti.

Israel sipaite'n Gaza City-a cheng, civil mite chhim lama inthiarfihlim tura a hriattir hnuah, mi nuai ruk vel chuan khawpui hi an chhuahsan tawh.

Biden-a'n Israel a thleng

US president Joe Biden chuan nimin khan Israel a thleng. A hmaa a lo ruahman lawk, Jordan ram tlawh tel a tum chu a ṭhulh.

President Biden hian Israel a tlawh zawhah, Jordan ramah kalin Amma khawpuiah Jordan lal, King Abdullah II, Palestinian Authority president Mahmoud Abbas leh Egypt president Abdel Fattah El-Sisi-te hmuh a tum a ni. Mahse Gaza hospital beih a nih hnuah, President Abbas hian meeting an neih tur hi a ṭhulh a, Jordan pawhin an tel kim dawn loh chuan meeting huaihawt hi a tum lo tih a sawi ve nghal bawk. Hei vang hian Biden pawhin Jordan ram tlawh a tum hi a ṭhulh ve leh ta a ni.

Israel pana a thlawh chhuah hmaa thu a sawiah, President Biden chuan Al Ahli Arab hospital beih a ni leh, mi tam takin nunna an chan chu pawi a ti hle tih a sawi. He thil thleng chanchin a hriat veleh King Abdullah II leh Israel Prime Minister pawh a biak nghal thu sawiin, pawikhawihna thlen dan leh pawikhawihtu dik tak hre chhuak tura national security team pawh a hriattir nghal thu a sawi.

Hamas-in an mi mante chhuah remti

Hamas senior official chuan Israel sipaite'n Gaza Strip-a airstrike an tihtawp chuan an mi man zinga hmeichhia leh naupangte chu chhuah an remti dawn tih a sawi.

Israel-in beihpui a thlakna hi a tihtawp aṭanga darkar khat chhungin an mi hrente chu an chhuah thei dawn tih a sawi. Tunah chuan Isarel sipaite'n airstrike an neih reng avangin khawi hmunah mah chhuahtirna tur hmun him a awm lo a ni, a ti.

Hemi rual hian Hamas chuan October 7-a Israel an beih ṭuma an mi mante zawng zawng chu an kutah an awm vek tawh lo tih an sawi bawk. Hamas te hian Israel mi bakah, ram dang mi eng emaw zat an man tel. Thawhlehni khan Supernova Sukkot Music Festival hmangtute an beihna hmuna an mi man, Israel nula kum 21 mi French-Israeli citizen, Mia Schem video chu an chhuah a, he nula ban hi bandage-a tuam a ni.

Singapore-in Israel-Hamas kaihhnawih thilah pun khawm khap

Israel leh Hamas-te indona thleng mekah, ram hrang hranga Israel leh Hamas thlawptute'n kawngte zawhin, an ṭan lamte an thlawpna thute an aupui. Hetih lai hian Singapore thuneitute chuan an ramah Israel-Hamas buaina thleng kaihhnawih thila pun khawm an khap.

Singpaore Police Force (SPF) leh National Parks Board (NParks) chuan, an ram leh mipuite himna atan, Israel leh Hamas kaihhnawih thila pun khawm hi khap tlat a ni a, dilna lut a awm pawhin hnawl zel a ni ang, tiin an sawi a ni. NParks chuan Speakers' Corner hman dilna theh lutte pawh an awm tih an sawi a, mahse, an remti lo tih an sawi. SPF pawhin mipuite chu online emaw, hmaichhanah emaw pawh Israel-Hamas chungchang an sawinaah fimkhur tur leh, ṭawngkam mawi lo leh huatthlala tak takte hmang lo turin a chah bawk.