Trump-a'n biakin leh sakhaw hmun dang hawng turin a ti

United States (US) president Donald Trump chuan sakhaw hmun hrang hrang - biakin, mosque leh synagogue-te chu essential services an nih thu sawiin, heng hmunte hi hawng tawh turin a ti. 

President Trump chuan state governor-te chu biakin te leh sakhaw hmun dangte hi hawn phalsak tawh turin a ti a, hawn phal lo an awm a nih chuan a thuneihna hmangin a hawn luih tir tur thu a sawi. Trump chuan an zu dawr leh abortion clinic-te chu governor ṭhenkhatten hawn an phal thu leh essential service-a an sawi thu a tarlang a, hei vang hian biakin te pawh essential service an nih ve tho thu a sawi a ni. 

US Centers for Disease Control chuan inkharkhipna kalpui a nih hnuah  restaurant, school, childcare program, mass transport leh sumdawnna hrang hrang hawn chhoh dan tur a duanna phek 60-a chhah a tichhuak a, mahse he a thil duan zingah hian biakin leh a kaihhnawih a tel lo thung a ni.

Worldometers in a tarlan danin, nimin thleng hian khawvel pumah Covid-19 kai hi mi  54,01,612 an awm tawh a, an  zingah mi 3,43,804 in he hri hi an thihpui tawh a ni. US chu hri kai leh he hri vanga thi tamna ber ram a la ni chhunzawm zel a, US bikah hri kai hi 16,66,828 awm tawhin hri vang hian mi  98,683 an thi tawh a ni. Brazil ramah hri kai hi nasa taka pungin, hri kai tamna ram pahnihna a ni tawh a, hri kai hmuh chhuah tawh hi mi 3,47,398 an awm tawh a, mi 22,013 in an thihpui tawh bawk.