Kim Jong-Un mipui hmuhah inlan

North Korean supreme leader, Kim Jong-un chu May 1 hnuah a ṭum khatna atan Inrinni khan mipui hmuh theihin a inlan leh. 

Hun eng emaw chen mipui hmuha a inlan loh hnuah May 1 khan Kim hi Sunchon khuaa fertilizer factory hawnna inkhawmah telin ribbon a chep chat lai thlalak chu Korean Central News Agency (KCNA) chuan a tarlang. Hemi hnu hian a chanchin hriat zui loha a awm leh reng hnuah,  KCNA chuan Inrinni khan Central Military Commission a kaihruai tih sawiin, a thlalak a tichhuak leh a ni. 

KCNA-ina a tarlan dan chuan Kim hi Workers` Party-in Central Military Commission meeting an neih chu a kaihruai a, he meeting-ah hian nuclear lama ralthuam siam belhna tur policy thar an duan leh an rama sipaite tihchak dan tur an sawi a ni. Sipai kaihhnawihah Kim hian 'order' 7 a sign thu KCNA chuan a tarlang bawk a, Central Military Commission meeting an neih hi engtik ami nge a ni tih erawh a tarlang lo thung.

Hriat theih hnuhnung berah chuan Kim hian Central Military Commission meeting a kaihhruai hi nikum December thla kha a ni a, KCNA-ina he meeting a rawn sawi hi engtik a neih nge tih a chiang lo a ni. Kim hi a thi niin a chanchin a thang nasa hle a, May 1-a KCNA-ina fertilizer factory hawnnaa Kim a inlan thu a tarlan takte pawh kha engtika a hawn nge tih engmah a chiang lo bawk.