Taliban-ten ni thum inkahhai puang

Afghanistan-a Taliban firfiak pawl chuan nimin aṭanga hman ṭan, Muslim festival Eid al-Fitr vangin sorkar lakah ni thum chhung inkahhai a puang. 

President Ashraf Ghani chuan Taliban-te inkahhai puan chu lawmawm a tih thu sawiin, sipaite pawhin an zawm ṭhat tur thu a sawi. 

Taliban thupuangtu, Zabihullah Mujahid chuan Inrinni khan inkahhai an puan thu hi sawiin, an mi leh sate chu ni thum chhung an hmelmate lakah pawh pawikhawihna engmah thlen lo turin a ti a, hmelma ten an bei a nih erawh chuan inveng turin a fuih. Inkahhai hi Eid al-Fitr pual liau liaua puang an nih thu a sawi bawk. 

Firfiak pawl hian inkahhai hi ṭum thum an puanna a ni a, kum 2018 hnua an puan vawi khatna a ni. Kumin kumtir lam khan Taliban hian Afghanistan-a ram dang sipai awmte lakchhuah an nihna turin US chu inremna a siampui a, hemi hnu hian ram dang sipaite an beih titawp mah se Afghan security force-te erawh an la bei chhun­zawm reng a ni.