Ram 34-ah Zika virus a leng

World Health Organization (WHO) chuan Zika virus chu ram 34 ah hmuh a ni tawh tih sawiin, heng zinga a tam zawk chu America leh Caribbean ram an ni tih a sawi.

New York-a WHO Office executive director, Natela Menabde chuan UN Economic and Social Council (ECOSOC)-a UN member ramte an kawmnaah hei hi a sawichhuak a ni. Brazil chu Zika virus hluarna ber ram niin, he virus-in a thlen nia hriat microcephaly nausen pawh 4,700 chuagn an awm tawh a ni. Zika hri len a darh tak tak hma kha chuan microcephaly nei nausen hi kum khatah mi 163 vel an awm anga chhut a ni.

Natela Menabde chuan Zika virus zirchiang leh a hri danna, vaccine siam hna thawhna atan te, hri leng laka mipuite himna tur leh an inven theih dan turte thehdarhna atan, a hri vei tawhte enkawlna pekna atan te US dollar maktaduai 56 mamawh a nih thu a sawi. Sum mamawh zingah dollar maktaduai 25 hi WHO, the Regional Office for the Americas (AMRO) leh Pan American Health Organization (PAHO) hnenah pek a ni ang a, a dang dollar maktaduai 31 chu an thawpui dangte hnathawhna atan pek a ni bawk ang.