Donald Trump hi President a ni lo ang : Obama

US President Barack Obama chuan US President hna chu hna hautak tak a nih avangin Republican president candidate chuhtu zinga hmahruai mek, Donald Trump chu president a ni thei lo ang, a ti. Trump-a president atana thlanglo tur hian America mipuite pawh a la ring ngam tawk tih a sawi.

Sumdawng hausa, Donald Trumps hi Republican party presidential candidate zingah hma a hruai mek a, state primary election pakhatah chakin, Inrinni-a inthlan neih lehna tur, South Carolina-ah pawh mipui ngaihdan lakah hma a hruai mek a ni.

California-a Asean economic summit-a reporter-ten an kawmnaah hei hi sawiin, President Obama chuan, "Mipuite chuan President hna hi hna mai mai a ni lo tih an hriat avangin Trump hi an thlang lo ang. Reality show leh sumdawnna kalpui ang mai mai a ni lo, hna hautak tak a ni. Chanchinthara lan duh vanga mahni duhzawng leh lungawina sawi chhuahna mai chi a ni lo" a ti.

Donald Trump hian a campaign-naah sawisel hlawh tak tak thu a sawi fo a, President a nih chuan an rama document mumal nei loa pemlut mi maktaduai 11-te chu a thawn haw leh tur thu te, chhim lama Mexico ramri hungna bang siam a tum thu te, Muslim-te US-a luh a khap tur thute a sawi a ni.

Trump chuan President Obama sawiselna hi chhang letin, an rama chhiatna nasa tak thlentu President-in a sawisel chu a tan thil lawmawm tak a nih thu a sawi. Kum 2012 President thlannaa a chuh loh kha Obama hian a vannei pui phah nia sawiin, he inthlanah hian chuh ve ni se chuan Obama hian President hna hi term khat bak a chelh lo ang, a ti.