France-in May thla thleng emergency puang dawn

France Parliament chuan nikum November thlaa firfiakten an ram khawpui, Paris an beih avanga emergency an puan chu thla thum chhunzawm leh an remti a, May 26 thleng puan chhunzawm a ni ang.

Kum 2015, November 13 khan Paris khawpui hmun hrang hrang chu firfiakten beiin, mi 130 an thih bakah mi dang tam takin hliam an tuar a ni. Pawikhawihnaa inhnamhnawiha rinhlelhte dapchhuah hna chak zawka kalpui a nih theih nan leh, judge-te thupek nghak kher loa hren an nih theih nan ram pumah emergeny an puang nghal a ni.

President Francois Hollande chuan emergency puan hi chhunzawm zel turin a lo nawr tawh a, Thawhlehni khan Parliament lower house, National Assembly-ah vote lak a ni a, thla thum dang puan chhunzawm leh hi an remti ta a ni. Thawhṭanni khan upper house, Senate chuan a lo pawm tawh bawk.

Interior Minister Bernard Cazeneuve chuan an ram chu firfiakte pawikhawihna thlen mai hlauhawm din≠hmunah a la ding reng tih sawiin, emergency puan chhunzawm an la mamawh tiin a sawi.

Hetihlai hian human right group-te chuan emergency puan hnuaiah police-te chu mipuite dikna chanvo palzut zawnga an chet thu an sawi a, hei vang hian emergency puan chhunzawm hi an duh loh thu an sawi.