South China Sea-ah China-in missile a dah

China chuan Taiwan nena an ram inchuh, South China Sea-a Woody thliarkar-ah surface-to-air missile a dah lut nia sawi a ni. Woody thliarkar hi Paracel thliarkar rual zinga pakhat a ni.

Fox News in satellite thlalak a tihchhuahah, Woody thliarkar, Yongxing thliarkar tia sawi bawkah hian China-in a dah luh nia sawi missile launcher pariat battery pahnih leh radar system thla a lang. He thlalak hi February 3-a lak niin a sawi. China Foreign Minsiter Wang Fi chuan missile an dah nia sawi hi thu dik lo a nih thu leh, khawthlang media-ten an phuahchawp mai niin a sawi. Mahse Taiwan chuan thu dik a nih thu a sawi thung.

Beijing-a chanchin thar lakhawmtute a kawmnaah, Wang chuan media-te chu South China Sea-a lawng veivakte himna tura China-in lighthouse a sak chu ngaihven zawk turin a ti.

Hetihlai hian Woody thliarkarah missile thla an lak hi HQ-9 air defence system nia an hriat thu US defence official chuan asawi a, km 200 chin kap thei a ni.

South China Sea-a thliarkar rual awmkhawm, Paracel archipelago-ah hian mi 1,000 vel an cheng a, an zinga a tam zawk hi sipai niin, in sak hna thawktu leh sangha man tute an awm bawk. Kum 1956 khan he thliarkarah hian China chu a inbun nghet a, South China Sea bial puma rorel hna kalpui turin Sansha city local government chu kum 2012 khan a din bawk. Mahse he thliarkar hi Taiwan leh Vietnam nen neitu nih an inchuh mek a ni.