UN hotu hlui Boutros-Ghali a thi

United Nations Secretary General hlui, Boutros Boutros-Ghali chu kum 93 mi niin Thawhlehni khan Cairo hospital-ah a thi.

Boutros-Ghali hi kum 1992-1996 inkar khan UN hotu niin, Egyptian Kristian a ni a, Arab zingah he dinhmun chelh thei hmasa ber a ni. Mahse UN hotu hna a chelh lai hian Rwanda ramah insuatna nasa tak a thleng a, he pawikhawihna thleng a dan theih loh avangin UN pawhin dem a hlawh hle. Bosnia-a NATO sipaiten bomb an thlak tur a dodal tlat avangin US pawh a ti thinur a, UN hotu hna a term hnihna tur atana chuh a tum pawh US hian a veto hmangin a dang a, UN hotu zingah term khat chelh awmchhun a ni ta a ni. Kum 1996 khan Kofi Annan-an a thlak.

UN a chhuahsan hnuah, Boutros-Ghali hian kum 1998-2002 khan French ṭawng hmang ramt inzawmkhawm, La Francophonie-ah secretary-general hna a chelh leh a, kum 2004 khan Egypt human rights council president atan ruat a ni.