Israel-Hamas war : Egypt-in Rafah crossing hawn a remti

Egypt president Abdul Fatah Al-Sisi chuan Gaza Strip-a chhawmdawlna thawn luh a nih theihna atan Egypt leh Gaza inrina, Rafah crossing chu hawn a remti niin Israel tlawha zin, US president Joe Biden chuan a sawi.

President Joe Biden hian Nilaini khan Israel a tawh a, darkar riat vel a awm a ni. US pana a kir dawna chanchinthar lakhawmtute a kawmnaah, Egypt President Al-Sisi nena an inbiak thu leh, Egypt ramri kaltlanga Gaza mipuite chhawmdawlna tur phurtu, truck 20 te luhtir a remti a ni, a ti. Ramri bulah hian aid convoy truck hi tam tham tak an ding tawh a ni. Egypt pawhin President-in ramri hawn a remtih thu hi a nemnghet bawk.

Joe Biden chuan Rafah crossing hawn hun tur erawh a sawi lang lo a, mahse, White House thupuangtu John Kirby chuan kawng siam ṭhat a nih hnuah hawn a ni dawn tih sawiin, ni rei lote hnuah an hawn theih a beisei thu a sawi.

President Biden chuan Gaza Strip-a civil mite chhawmdawlna atan US-in USD mtd 100 a pek tur thu a puang. Congress-ah Israel puihna tur USD tld 10 dil a tum niin a sawi bawk.

October 7-a Hamas firfiakte'n Israel chhim lam lut ru a, pawikhawihna rapthlak tak an thlen hnuah khan Israel hian Gaza kalpawhna pahnih, Gaza Strip hmar lama Erez crossing leh chhim lama Kerem Shalom crossing te a khar nghal a, hei vang hian Gaza Strip-a chengte hian ei tur, tui, fuel, damdawi leh mamawh dangte an tlachham tawh hle a ni.

Nimin khan Israel leh Hamas firfiakte indo ni 13-na a ni tawh. Israel hian Gaza chhim lamah airstrike nei lehin, mi 30 an thi nia sawi a ni. Hei bakah hian nimin zing lam khan Lebanon chhim lama Hezbollah pawl hmun a kap bawk a, mi pahnihin hliam an tuar.

West Bank-a Ramallah-ah Palestinian Authority president, Mahmoud Abbas laka lungawi lote pung khawmin, security force-te chu lungin an tawng. Palestinian security force-te chuan pung khawmte hnawhdarh nan hian tear gas leh stun grenade-te an hmang.

UK PM-in Israel a thleng

US president Joe Biden-a'n Israel a tlawh hnuah, nimin khan United Kingdom prime minister Rishi Sunak pawhin Israel a thleng ve leh. Israel prime minister Benjamin Netanyahu leh president Isaac Harzog-te hmuin, Hamas leh Israel indona thleng mek chungchangte a sawipui ang.

Israel a thlen thu hi Sunak chuan a X-ah tarlangin, firfiaka chetna thleng avanga tuarte a tawrhpui thu a ziak. Indona thleng avanga Israel leh Palestine-a nunna chan chhungte a tawrhpui thu pawh lo sawi tawhin, indona chu titawp thuai tura a duh thu a sawi.

US-in UNSC draft resolution a hnawl

US chuan Nilainia United Nations Security Council-in Israel leh Hamas indona thleng mek chungchanga Israel laka draft resolution a siam chu a veto power hmangin a hnawl.

Brazil sorkarin a duan, resolution chungchanga vote lak tum hi ni hnih chhung tihkhawtlai a ni a, Nilaini khan vote hi lak a ni ta chauh a ni. Draft text thlawp lamah hian member 15 zinga 12 in an vote a, Russia leh Britain erawh an hai thung. Mahse permament member US chuan a hnawl ta a ni.

UN-a US ambassador, Linda Thomas-Greenfield chuan, "Palai hna kan thawk mek a, hemi hi ngaihchan phawt a ngai a ni," a ti. Resolution siam chu a pawimawh rualin, Council chu a ṭawng chhuah a ngaih thu a sawi. Hemi rual hian an hmalak dan turah pawh thil thleng dik tak an hriat phawt zel a ṭul a ni, a ti. US hian tun hma lam pawhin Security Council-in Israel laka action lak a tumnaah a lo hum zel ṭhin.

Egypt leh Jordan-in Palestinian raltlan lak luh duh lo

Arab ramte chuan Palestinian lam an thlawp thu sawi hlawm mah se, Gaza Strip aṭanga Palestinian raltlante chu an rama luhtir an duh lo thu an sawi thung.

Israel-in Palestinian ram a luahsak, Gaza Strip leh West Bank ramri, Egypt leh Jordan chuan indona thleng mekah Palestinian raltlante chu an ramah lak luh an tum lo tih an sawi. Egypt President Al-Sisi chuan tuna indona thleng mek chu Hamas-te beihna bakah, Egypt-a civil mite tlan luhtir tumna a ni tiin, raltlan tam tak an lut chu boruak muanawm tichhe thei a ni tiin, an luh an remti dawn lo tih a sawi. Jordan lal, King Abdullah II pawhin, "Jordan-ah refugee luhtir an ni dawn lo a, chutiangin Egypt-ah pawh luhtir an ni lo ang, " tiin a lo sawi tawh bawk. Jordan ramah hian Palestinian mi ṭhahnem tham tak an awm tawh a ni.