CAR president thlanah PM hlui a chak

Central African Republic President thlan thawh hnihna, kar kalta Inrinni-a neihah Prime Minister hlui Faustin-Arcahnge Touadéra chu thlan tlin a ni.

Inthlan thawh khatna neihah khan Touadéra hian PM hlui ve, Anicet-Georges Dologuélé aiin vote a hmu tlem zawk a, mahse hemi ṭuma pathumna chuan inthlan thawh hnihnaah hian Touadéra hi a thlawp tak avangin hneh taka thlan tlin a ni ta a ni.

President thlan thawh hnihnaah hian kum 58 mi, Touadéra hian vote tla aṭangin 63% a hmu pha.

Dologuélé chuan inthlanah hian thil fel tawk lo awm mah se, result chu a pawm thu leh, Touadéra chu an ram president atan a pawm thu a sawi.

Touadéra hi kum 2013-a Mus-lim hel ṭangrualten president
aṭanga an paihthlak, François Bozizé hnuaiah prime minister dinhmun a chelh a ni. Mathematic professor leh university official, Touadéra hi kum 2013 kumtawp lama an rama tualchhung buaina a thlen ṭum khan an ram chhuahsan duh lo a, an ram khawpui Bangui-ah a awmchilh tlat avangin thlawptu pawh a neih ṭhat phah hle.

Kum 2013 kumtawp lama Muslim Seleka helten thuneihna an chan hnu khan CAR-ah hian tharum thawhna leh thisen chhuahna a thleng fo a, an ram mipui hmun ngaa ṭhena hmun khat chuan tualchhung indona thleng avang hian in leh lo an chan bakah ramdangah himna zawngin an tlanchhia a ni.

Touadéra pawhin a campaign au hlaah an ram himna pek a tiam a, ramchhunga inbei tawn reng, Muslim leh Kristian-te inakara inpumkhatna ṭha siam leh hel tibo tura a beih tur thu a sawi. An ram sum dinhmun pawh siamṭhat a tiam bawk.