Zika virus laka beihpui thlak nan drone hmang

Brazil sorkar chuan an rama Zika virus leng mek tihrem tumin beihpui a thlak mek a, khawpui lian ṭhenkhatah chuan beihpui thlakna atan hian drone hman a ni.

Official-te chuan drone hmang hian khawpui chhunga Zika virus thlentu, Aedes aegypti thosi pian theihna hmun turte dapchhuah hna thawh a ni tih an sawi. He thosi hian Zika virus bakah dengue leh chikungunya virus te pawh a thlen thei a ni.

Zika virus do letna campaign nei tur hian sipai leh sorkar hnathawk ṭhahnem tak hman mek an ni a, anni hian in tinah kalin virus insiam theih dan leh a inven dante mipuite an hrilh ṭhin a, in maktaduai 27.5 vel an tlawh tawh niin sorkar chuan a tarlang.

Mahse hmun ṭhenkhatah chuan sorkar mi tirhte hi in neitu ṭhenkhat chuan an lo hmu duh lo a, hei vang hian heng hmunte enfiah tur hian drone hi hman a ni. Drone-ah hian video camera dah a nia, heta ṭang hian operator-te chuan thosi pian theihna hmunte an hre thei a ni.