US-in NKorea rawtna a hnawl

US chuan North Korea-in Korean War titawpna tura inremna siam dan kawng zawng tura inbiak a rawtna chu a hnawl niin State Department thupuangtu, John Kirby chuan a sawi. Rawtna a hnawlna chhan hi NKorea-in a nuclear program a tihtawp duh loh vang niin a tarlang.

Wall Street Journal-in NKora-in nuclear bomb a enchhin hnuhnun ber hma lawk khan White House chuan NKorea hi inremna zawnga inbiakna neihpui a lo remti tawh nia report a chhan letna-ah he thu hi Kirby hian a sawi a ni.

Kirby chuan NKorea hian inremna siamdan kawng zawnga rawtna a siam thu sawiin, "An rawtna siam hi ngun taka kan ngaihtuah hnuah, inbiakna neih dawn chuan, nuclear programme a tihtawp phawt a ngai tih kan sawi a, hei hi Nkorea chuan a pawm thei lo a ni" a ti.

North Korea hian 1950-53 Korean War chung-changah US leh ram dangte chu inremna thu-thlung ziahpui a tum a, hei bakah hian US leh South Korea sipaiten nunchan an zirho ṭhin chu titawp turin a duh bawk.

Hetihlai hian January thlaa nuclear ralthuam a enchhin leh avangin khawvel ram hrang hrangte chuan NKorea hi an dem thu an sawi a, UN Security Council pawhin hrekna na zawk siam a remti bawk. Kar kalta khan US President Barack Obama chuan US Congress-in NKorea hrek belhna tur a siam chu a pawmpui a, he dan thar hmang hian North Korea-in nuclear ralthuam a siamna tura hmanrua leh technology thawnluhte chu hrek an ni ang. Hei bakah hian NKorea-a mihring dikna chanvo palzuttute pawh hrem tel an ni bawk ang.