Fiji-ah thlipui tleh vangin mi 17 thi

Fiji rama thlipui tleh vanga thi chu mi 17 an tling tawh.

Cyclone Wintson chuan kar kalta Inrinni zan khan Fiji ram hi darkar khata km 325-a chakin a nuai a, thil tam tak a ti-chhia a ni. Thlipui tleh vanga thi hriatchian tawh hi mi 17 an tling tawh a, mahse hmun kilkhawr zawka awmte aṭanga record a la thlen kim loh avangin thi zat pawh hi an la punchhoh rin a ni.

Inrinni zana thlipui tleh hi Fiji rama thlipui tleh na ber record a ni a, chenna in tam tak nuai chhiain, chenna neilote chu sorkarin an awm lailawkna tur a siamah an khawsa mek a ni.

Oxfam Pacific region director Raijeli Nicole chuan hmun tam takah inbiakpawhna a chhiat avangin thlipuiin thil a tihchhiat dan kimchang hi hriat a la har niin a sawi.

Prime Minister Vo-reqe Bainimarama chuan thlipui tleh vang hian mi tam tak chu power supply leh tui thiang-hlim in tur nei loin an awm tih a sawi a, an ram chuanhnuai lamah chuan tui a lian bawk niin a sawi. Police leh sipaite chuan thlipui tuarte chhan-chhuah leh chhawmdawl hna hi an thawk a, sorkar agency hrang hrangten kawngpui hnawkte an thianfai bawk.