Britain mipuiten EU-a awm an duh leh duh loh thlang dawn

Britain Prime Minister Davidon Cameroon chuan European Union (EU) hnuaia awm chhunzawm an duh leh duh loh chungchangah June 23 hian an ram mipuiten vote an thlak dawn tih a sawi.

David Cameroon chuan vote lak chungchang hi British Parliament chuan dan ang taka a tihfel phawt a ngai dawn tih a sawi. Mahse Parliament-ah hian Cameroon-a party, Conservative Party in majority a neih avangin awlsam taka a tlang rin a ni.

Cameroon chuan, EU hnuaiah Britain chu a him zawk a, a chak zawkin a dinhmun pawh a ṭhat zawk a rin thu a sawi a, mahse mipuite duhthlanna erawh a zahsak tur thu a sawi. Parliament-in vote lak hun tur a pawmpui hnuah, sorkar chuan EU-a an awm chhunzawm zelna turin campaign a nei nghal dawn tih a sawi bawk.

Hetihlai hian Tory party senior member-te chuan EU aṭanga inlakhran an thlawp thung a, 'Leave EU' campaign kalpui an tum ve bawk.

Conservative hruatu zinga mi, David Cameroon thlak thei tura rinkai ber, London Mayor Boris Johnson pawh EU chhuahsan duhtu zingah a tel. Johnson chuan EU chuan sumdawnna leh thawhhona lamah inzawmna ṭha tak neih duh mah se, politics lama inzawmna neih a duh lo tih a sawi.