Bolivia danpui siamṭhat tumna thlawp lo

Bolivia President Evo Morales-an a term li-na atana President a chuh leh theihna tura an ram danpui siamṭhat a tum chu mipuite an thlawp lo.

Ram danpui siamṭhat tum chungchangah Pathianni khan Bolivia mipuite ngaihdan lak a ni a, mahse siamṭhat duh lo lamah vote a tla ṭha zawk a ni.

Kum 56 mi, Morales hian Bolivia President term thumna a chelh mek a,kum 2019-ah President thlanna hi neih leh a ni ang. Morales chuan a term li-na atan President inthlana a chuh leh theih dan kawng zawngin, an ram danpui hi siamṭhat a tum a ni.

Mahse mipuite vote laknaah ram danpu siamṭhat duhtu hi 47.4% an nih laiin, thlak danglam duh lo hi 52.3% anni thung. Hei vang hian Morales-an kum 2025 thlenga president dinhmun chelh chhunzawm a tumna chu a hlawhtling thei dawn ta lo a ni.

Electoral commission chuan vote a tla ṭha hle tih sawiin, vote tla hi 88% a tling niin a tarlang.

Evo Morales hi Bolivia ram leilung fa ngei zinga President ni thei hmasa ber a ni a, an rama mi rethei dinhmun chawikanna kawngah a thawk nasa hle. Kum 2006 khan President atan thlan tlin niin, tunah hian a term thumna a chelh mek a ni.