Israel-Hamas war : Rafah crossing kawngpui siam ṭhat hna thawk mek

Egypt-in Gaza Strip-a chhawmdawlna thawn luh a nih theihna atana Rafah border crossing hawn a remtih hnuah, kawngpui siam ṭhat hna thawh mek a ni.

Rafah crossing hi Gaza Strip kalpawhna, Israel-in a thunun loh awmchhun a ni. Israel hian Hamas-te'n Israel an beih hnuah Gaza Strip kalpawhna dangte chu a khar vek a, hei vang hian Rafah crossing chauh hi Gaza Strip luh leh chhuahna dang a awm a, hei pawh hi Israel-Hamas indo hnuah Egytp hian a hawng duh bik lo a ni.

US president Joe Biden nena an inbiak hnuah, Egypt president Abdel Fattah Al-Sisi chuan Rafah crossing hi chhawmdawlna phurtu truck luhtir nan hawn a remti a, mahse, kawngpui a chhiat em avangin siam ṭhat phawt an ngaih tur thu an sawi.

October 7-a indona a thlen hma pawh khan, Gaza Strip-a cheng mi maktaduai 2.3 vel chu chhawmdawlna ringa khawsa sa an ni. United Nations-in a tardan danin, Gaza-a Palestinian mite chhawmdawlna tur hi ni tin truck 100 velin an phur lut ziah ṭhin. Indona tuartu, mipui chhawmdawlna tur phurtu truck 100 chuang Egypt lama Rafah crossing bulah hian an ding tawh a ni.

Khawthlang ramte chuan Rafah crossing kaltlang hian Gaza Strip-a cheng, foreign passport neite hruai chhuah dan chu Egypt official-te an sawipui mek bawk a, inremna erawh an la siam thei lo.

UK PM-in Israel-in Hamas a beih letna a thlawp

Ni hnih cham tura Israel-a zin, UK prime minister Rishi Sunak chuan Israel-in a ram chhanna tura dikna a neih leh, Hamas-te a bei let chu a thlawp tih a sawi.

Israel prime minister Benjamin Netanyahu nena joint conference an neihah, Sunak chuan, 'Hamas te tihdan ang loin, nangni chuan civil mite tawrhna thlen lo thei tur berin in fimkhur hle tih pawh ka hria. Palestinian-te pawh Hamas-te pawikhawihna tuartu an ni tih pawh kan hria a ni," a ti. Hamas firfiakte pawikhawihna rapthlak tak tuartu, Israel chu United Kingdom chuan a tawrhpuiin, an thlawp zel dawn tih a sawi a ni. Israel chu hnehna chang ngei tura an duh thu pawh a hrilh.

Rishi Sunak hian Egypt-ah kalin, president Al-Sisi pawh Israel-Gaza buaina chungchang sawipui a tum a, a hmain Saudi Crown Prince Mohammed bin Salman pawh a lo sawipui tawh bawk.

Drone leh rocket-in Iraq-a US military base bei

Iraq militant-te'n Israel-Hamas te indo mekah Israel thlawp lo tur leh, inrawlh lo tura US an vau hnuah, Ningani khan Iraq-a US military base pahnih chu drone leh rocket hmanga kah a ni tih official-te'n an sawi.

Rocket leh drone hmang hian Iraq khawthlang lama awm, US bakah international force-te awmna, Ain al-Asad air base kah a ni a, base chhungah hian thil puak ri pawh hriat a ni bawk.

Baghdad international airport bula US sipaite awmna, military base chu rocket hmanga kah a ni tih Iraq police-te chuan an sawi bawk. US official chuan rocket pakhat chu an lo kah thlak thu leh, pakhat chuan base chhunga thil dahna hmun ruak a fuh tih sawiin, thi an awm lo tih a sawi bawk a ni.

Kar hmasa khan Iran sorkar hnuaia armed group-te chuan Israel leh Hamas buaina thleng mekah, US chu a inrawlh ve a nih chuan missile leh drone hmanga an beih let tur thu sawiin US hian an lo vau tawh a ni. US hian Iraq-ah sipai 2,500 vel a dah mek a, Syria-ah 900 a dah bawk.