Israel-Hamas war : Israel-in Gaza-a chengte insawn chhuak turin hriattir leh

Israel sipaite chuan Gaza Strip-a beihpui an thlak mekah, civil mite chu chhim lama insawn chhuak turin an hriattir leh. An inthliarfihlim duh loh chuan, Palestinian firfiak pawl, Hamas thlawptu leh humtu angah ngaih theih an ni dawn a ni, an ti.

Gaza mipuite hnena hriattirna hi Inrinni khan Israel Defence Forces (IDF) chuan leaflet hmangin an thlak a, mobile phone-ah audio message an thawn chhuak bawk. A hmain IDF hian mipuite hi Gaza chhim lamah inthliarfihlim turin a lo hriattir tawh bawk a, mi sing tel chu an insawn chhuak tawh a ni.

October 7 aṭanga Israel leh Hamas-te indonaah hian Palestinian 4,385 leh Israel mi 1,400 chuang an thi tawh.

Israel hian boruak lam aṭangin beihpui a thlak chhunzawm reng a, lei lam aṭang pawhin beih a, luhchilh tumin Gaza ramri-ah tank leh sipai ṭhahnem tak a chhawp tawh bawk. Mahse a luhchilh hun tur tak erawh a la sawi lang lo.

IDF international spokesperson, Lt. Col. Peter Lerner chuan lei lam aṭanga bei turin an inpeih tawh a, sorkar thupek chiah an nghak tawh tih a sawi. Ground operation neihna tur atan hian sipai reserve nuai thum lak an ni, a ti.

Lebanon ramri bula Israel mite hruai chhuak

Israel chuan Hamas-te nena an inbeih mek karah, hmar lama an ram ṭhenawm Lebanon-a Hezbollah hel pawlte'n Israel an lo beih ve reng avangin, Pathianni khan Lebanon ramri bula awm Israel mite an hruai chhuak leh.

Hezbollah hian anti-tank missile, rocket, mortar leh silai hmangin Israel hi an bei a ni. October 16 khan Israel mi ṭhenkhat chu hruai chhuah an ni tawh a, mahse, Hezbollah te hi an la chet chhunzawm zel avangin nimin khan hruai chhuah belh leh an ni. An mi hruai chhuah zingah hian Juda bakah Arab hnam eng emaw zat an tel.

Gaza Strip-ah truck 20 lut tawh

Egypt-in Rafah border crossing hawn a remtih hnuah, Gaza Strip-a cheng Palestinian-te chhawmdawlna tur phurtu truck 20 chu an lut.

Hamas-te'n Israel an beih hnuah ramrite khar vek a ni a, hei vang hian Gaza-a chengte hian kawng hrang hrangin harsatna an tawk a, ei tur, tui, damdawi leh fuel thlengin an tlachham ṭan tawh a ni.

Egypt pawh hian Gaza nena an inrina, Rafah border crossing hi a hawng duh lo a, mahse, US president Joe Biden-a'n inbiakna a neihpui hnuah Egypt chuan hawn a remti ta a ni. Hemi rual hian truck 20 chauh an luh a phalsak a, hei hian mipuite mamawh a la phuhru lo hle tih chhawmdawl hna thawktute chuan an sawi. Truck 20-te hian UN children agency aṭangin tui bottle 44,000 an phur tel a, hi hi mi 22,000 te tana ni khat tla tawk chauh a ni tih Unicef executive director Catherine Russell chuan a sawi. Tui bakah damdawi leh ei turte an phur bawk.

Hamas-te'n an mi man pahnih chhuah

Hamas-te chuan kar liam ta Zirtawpni khan an mi man zinga pahnih, American nu leh a fanu tleirawl an chhuah. Hei hi October 7-a Israel an beih ṭuma mi eng emaw zat an man zinga an chhuah hmasak ber a ni.

Israel chuan Hamas hian mi 210 vel an la hreng mek niin an sawi. An mi hren mek zingah hian Israel mi bakah, Argentina, Germany, France, Thailand leh Portugal ram mite pawh an la tel.

Hamas-te'n an chhuah hi Judith leh a fanu, Natalie Raanan-te an ni a, Gaza boundary-ah Israel kutah an hlan a ni. US president Joe Biden pawhin Raanan-te nufa hi phone-in a be nghal a, chhuah an nih theihna atana palai hna thawktu, Qatar sorkar chu lawmthu a hrilh bawk. Qatar ministry of foreign affairs chuan Hamas mi hren mek dangte pawh chhuah an nih theihna turin, Israel leh Hamas-te chu inbiakna neihpui zel an tum thu a sawi.

Hamas thupuangtu, Abu Ubaida chuan Raanan-te nufa chhuah an ni chu Biden leh a kaihhruai sorkarin Hamas-te an puhna hrang hrang a dik loh zia America mipui leh khawvel hriattirna a ni, a ti.