Syria-ah Feb 27 atangin inkahhai puang dawn
US leh Russia chuan Syria ram sorkar leh eptu pawlten inkahhai puan an lo remtih tawh chu February 26 zanlai aṭangin khan hman ṭan a ni tawh tih an puang.
Inkahhai puan tur hi Syria sorkar leh President Bashar al-Assad-a kaihhruai sorkar laka helte inkarah chauh hman a ni dawn a, Islamic State (IS) leh al-Qaida zawmpui Nusra Front-te a huam tel dawn loh thu an thuchhuahah chuan an tarlang.
February 12 khan khawvel ram lian hruaitute chuan Syria tualchhung dinhmun ngaihtuahin, inkahhai puang turin inremna an lo siam tawh a ni.
Kum 2011, March thla
aṭanga Syria ram tualchhung buaina thleng avang hian mi 250,000 chuang an thi tawh a, mi maktaduai 11 vel chuan himna zawngin an in leh lo an tlanchhiatsan a, an zinga mi maktaduai li vel chu ram pawn lamah an tlanchhia a ni.
Syria sorkar pawhin April 13-ah an ram parliament inthlan buatsaih a nih tur thu a puang bawk. Inthlanpui hi kum li danah an nei ṭhin.
US leh Russia chuan Syria ramah inkahhai puan ni mah se, IS leh Nusra Front firfiak pawl lakah beihpui thlak chu an chhunzawm zel. Firfiakte laka beihpui thlaknaah hian ram pahnihte hian ṭha taka thawhdun an tum thu an sawi bawk.
US Secretary of State John Kerry chuan inremna a taka hman a ni tur chu lawmawm a tih thu a sawi a, "He inremna hian tharum thawhna thleng a tihtlem bakah, mipui chhawmdawlna hna thawh pawh chak zawkin a kalpui theih dawn a ni" a ti. Russia President Vladimir Putin pawhin inremna siam chu Syria rama kum nga chhung zet thisen chhuahna thleng tawh titawpna tura hmalakna pawimawh tak a ni, a ti.